نجل فؤاد المهندس: كنت مرعوبا من إخراج ابني لمسلسل بالطو لأنه أول تجربة.. وهو تلميذ شريف عرفة
كشف محمد المهندس، نجل الفنان الراحل فؤاد المهندس، تفاصيل دخول نجله عمر مجال الإخراج، والذي حقق نجاحًا كبيرًا في أولى تجاربه الفنية وهي مسلسل بالطو.
وقال نجل فؤاد المهندس، في لقائه مع القاهرة 24: عمر المهندس ابني كان عنده شغف من وهو صغير بالفن، وأنا شجعته على عكس والدي اللي مكنش شايف فيا نزعة فنية، وأنا وديت ابني لـ شريف عرفة وقلتله لو شايف أنه مينفعش مخرج قوله ومتخليهوش يكمل في حاجة مش هينفع فيها.
وتابع نجل فؤاد المهندس: أنا كنت مرعوب من أول تجربة إخراجية لـ عمر وهي مسلسل بالطو، كنت خايف وحاطط إيدي على قلبي ومتوقعتش النجاح الساحق ده للعمل.
وأضاف: عمر دلوقتي شغال على فيلم جديد اسمه سيكو سيكو، الفيلم قوي جدًا وعمر اشتغل عليه بمجهود كبير، وأوعد الجمهور أنه هيكون من أقوى الأعمال الفترة اللي جاية.
نجل فؤاد المهندس
ومن ناحية أخرى، سبق وأن كشف نجل فؤاد المهندس، سبب رفضه تقديم السيرة الذاتية لوالده في عمل فني، فعلق نجل فؤاد المهندس: مستحيل أوافق على تقديم السيرة الذاتية لـ فؤاد المهندس في عمل فني، ده شيء مرفوض تمامًا لأن حب الناس أهم حاجة، وحتى لو ابني المخرج عمر المهندس هو اللي هيخرج العمل مش هوافق، بعد ما أموت يعملوا اللي هما عايزينه.
