نجل فؤاد المهندس: شعرت بالموت بعد حريق منزل والدي.. وسأحافظ على مقتنياته حتى رحيلي
تحدث محمد المهندس، نجل الفنان الراحل فؤاد المهندس، عن الأثر النفسي لحريق منزله، بجانب حديثه عن مقتنيات والده الراحل الذي أكد أنه سيعمل على حصرها خلال الأيام القليلة المقبلة، بعد إتمام أعمال الإصلاح في المنزل.
وقال نجل فؤاد المهندس، في لقائه مع القاهرة 24: الحريق لما حصل كنت مذهول وقلت إني هموت بعد شهرين زي والدي، وكنت متقبل الوضع وقولت الحمدلله على كل شيء.
وتابع نجل فؤاد المهندس: أنا مش قادر أدخل الشقة بعد الحريق ولكني لازم أدخل لأنها بتتجهز تاني، الموضوع مأثر عليا نفسيًا الحريق حصل في رمضان وإلى الآن مدخلتش الشقة غير مرتين، وربنا يخلي ليا أختي بتبعتلي الأكل وكل حاجة.
وأضاف: أكيد هحافظ على مقتنيات والدي ومش هفرط فيها أبدًا، والله لو عملوا إيه، أهم حاجة في حياتي فؤاد المهندس، وأهم حاجة حاجات فؤاد المهندس لأن دي اللي سابهالي وأنا هسيبها لـ عمر ابني وابني هيسيبها لـ ولاده، لو كلفتني إيه هحافظ عليها لغاية ما أموت.
نجل فؤاد المهندس يكشف تفاصيل حياة والده
وسبق وكشف نجل فؤاد المهندس، تفاصيل حياة والده خلال الاحتفالية بمئويته، قائلًا: حياة الأستاذ الله يرحمه في البيت كان طيب جدا وبسيط ودمعته على خده لو شاف طفل، وكان خواف وصارم جدا، هو ربانا على أسس كتير جدا ومنها إننا نحب بعض وإزاي نواجه المشاكل والحياة، وعلّمنا الجدعنة وكل حاجة حلوة، هو كان أب شامل، كان بيضربني أنا لوحدي لأني كنت الشقي اللي في إخواتي، إيده كانت تقيلة وكان بعد ما يضربني يدخل يعيّط، وطنط شويكار تدخل عليه تلاقيه منهار من العياط، ومن طيبته كان بيحضني ويعيط وأنا بعتذر له.
