أبو الليف: الموسيقيين مش بيهتموا بالمهمشين.. ولما رحت مستشفى تبعهم بقولهم أنا بموت قالولي لازم وصل
هاجم الفنان نادر أبو الليف، الفنان مصطفى كامل نقيب المهن الموسيقية، حيث أشار إلى أن النقابة لا تهتم بالمهمشين أو الفنانين الذين يعانون من أزمات صحية، كما يدعي مصطفى كامل، أنه يهتم بهم ويمنحهم معاشات تقاعدية.
نادر أبو الليف: مصطفى كامل مش بيهتم بالناس المهمشة
وقال نادر أبو الليف في حواره مع القاهرة 24: مصطفى كامل والنقابة لا يهتمون بالأشخاص المختفين أو المهمشين أو من يعانون من أزمات صحية زي ما بيقول، وخلال أزمة مرضي مسألش عني لا بطريقة ودية ولا فنية ولا أخوية.
وتابع: لما أكون دافع للنقابة مبلغ وقدره، وتيجي تديني لما أتعب مبلغ أقل، أعمل بيه إيه، طب المفروض كان ساعدني، لأني كنت مستلف فلوس المستشفى ومحتاج أسددها وكنت متعشم في النقابة.
وأضاف: لما دخلت مستشفى تبع نقابة المهن الموسيقية وكنت بموت قالولي لأزم جواب تحويل، ومكنتش قادر أخد نفسي، وطلبت منهم يسعفوني الأول لأني كنت بموت، رفضوا وقالوا علشان نتعامل معاك، لازم تدفع رسوم الدخول، وقتها طلبت من زوجتي تروح تدفع، وحتى بعد ما دفعت قالولي منقدرش نعطيك جلسات تنفس غير لما نشوف الوصل.
أعمال نادر أبو الليف
يذكر أن نادر أبو الليف، طرح مؤخرًا أغنية زنانة، عبر موقع الفيديوهات الشهير يوتيوب، وهي من كلمات السيد علي، وألحان عماد تاج، وتوزيع مورو، وإنتاج طارق عبد الستار، وجاءت كلمات الأغنية كما يلي: عصبية بتعلي صوتك عليّا، الناس بصلنا يا ولية، لا لمي الدور، وأهدي شوية وأتهدى أحسنلك، زنانة طلباتك ليه ما بتخلص، ولغيرك عمالة تبصي، كفاية أكل شوية وخسي، وبصي على نفسك.
