شاب يتطوع بصدقة جارية على روح اللاعب أحمد رفعت بدمنهور│صور
تطوع شاب يدعى محمد سعيد من مدينة دمنهور في محافظة البحيرة، بصدقة جارية على روح أحمد رفعت، لاعب مودرن فيوتشر بعد وفاته في السادس من يوليو الماضي إثر تدهور حالته الصحية.
شاب يتطوع بصدقة جارية لـ أحمد رفعت
وتمثلت الصدقة الجارية في كولدير مياه عند زاوية غزال منشأة حمور، ليكون على روح اللاعب أحمد رفعت.
وقال الشاب محمد سعيد لـ القاهرة 24: استهدفت مكان على طريق عمومي بجوار المقابر ومعهد أزهري لاستفادة أكبر قدر من الناس، وعشان الآلاف يدعو له، لإن الجنازات بيكون فيها عدد كبير والأغلبية بتبقى الدفنة بعد صلاه الظهر.
وتابع محمد سعيد: أنا ناوي أستكمل في عمل الصدقة الجارية على روح اللاعب أحمد رفعت، وأنا اتأخرت في عمل الكولدير بسبب اختيار المكان والتكلفة، وكل اللي بعمله لوجه الله وصدقة جارية، وناوي أعمل دورة رياضية تحمل اسم اللاعب.
وأضاف محمد سعيد: كابتن أحمد رفعت ربنا يرحمه ويغفر له ويسكنه الجنة يا رب العالمين، أنا كنت بحب اللاعب دا، لأنه كان من الشخصيات المحترمة، وأنا لا أعرفه ولا هو يعرفني ولا حد من المقربين له يعرفني، كان مجرد لاعب كرة قدم أنا معجب بأدائه على المستوى الكروي، عشان كدا حبيت أهديه عمرة على روحه بعد وفاته، وخاصة أنه تعرض للظلم قبل موته، وأنا بحبه لأنه لاعب محترم وخلوق.
وفي وقت سابق، أدى محمد سعيد عمرة وقال عبر حسابه بموقع التواصل الاجتماعي فيسبوك: لبيك اللهم عمرة عن المحترم كابتن أحمد رفعت خالصة لله، وربنا يرحمه ويجعلها في ميزان حسناته.
