حماة المتهمة بقتل الطفلة جودي: لميناها من الشوارع وابني اتجوزها عشان صعبت عليه | خاص
حصل القاهرة 24 على نص التحقيقات في قضية مقتل الطفلة جودي، التي كشفت مفاجآت عدة، أبرزها أن والدة الطفلة المتهمة بقتلها، غادرت رفقة الطفلة من منزل زوجها، إلى منزل شخص آخر وتزوجته عرفيًا على زوجها الشرعي ياسر شعرواي، وأقامت لديه قرابة العامين.
مقتل الطفلة جودي
وتعود الواقعة إلى أن الطفلة جودي قتلت على يد والدتها بعدما أصيبت بنزيف داخلي؛ دخلت على إثره في غيبوبة، لم تفق منها، وذلك بعد انفصال والدها عن والدتها، بسبب خلافاتهما المتكررة، حيث تزوجت السيدة بآخر لديه 4 أطفال آخرين، واعتدت على طفلتها حتى تسببت في قتلها.
واستدعت جهات التحقيق والدة الزوج العرفي التي تزوجته المتهمة بقتل ابنتها جودي على زوجها، وتدعى هالة سید حسین حسین، وتبلغ من العمر 58 سنة، وتعمل ربة منزل.
وقالت حماة المتهمة بقتل بنتها جودي: اللي حصل إنه في شهر 8 لقيت نور الشقة عند ابني منور لأن أنا ساكنة جمبه روحت طالعة فقابلت بنت ابني جنى على الباب ولقيت واحدة قاعدة في الصالة هيا وبنتها فسألتها مین دی قالتلى دي واحدة جاية تسكن، وكانت قاعدة مع الأولاد لوحدها فنزلت كلمت ابني قالي دي واحدة قابلتها على الشارع بره وعايزه تسكن، روحت قولتله متنفعش تسكن علشان احنا في منطقة عشوائية وهي لوحدها قالي طيب هي هتقعد يومين لحد ما تدبر أمورها قالي تاخديها عندك؟، فرفضت علشان معايا شاب صغير في الشقة، قالي خلاص هنديها حاجه من شقتي تنام عليها في الأوضة اللي تحت، وفعلًا نزلت قعدت لمدة أربع أيام في الأوضة وبدأت تاخد على ولاده وتراعيهم وكان معاها ساعتها بنتها جودي، ودخلت في وسطنا وكانت بتقولي يا أمي وبدأت تقولي إنها عايزة تراعي عياله وعيالها وعلشان ابني معاه خمس عیال ومراته متوفية قالتلي هتخدمهم وكانت على نيتها خالص.
وأضافت والدة زوج المتهم بقتل الطفلة جودي: سألتها على أبو البنت قالتلي محبوس ومطلقني ومعايا قسيمة طلاق مع صاحبتي في عين شمس، وبعدها بأسبوع لقيت ابني جاي هو وزینب وبيقولي احنا کتبنا الكتاب عند محامي ولما سألته هتقعدها فين رد وقالي إنها قالتله موافقة تقعد على العفش القديم، والكلام ده في شهر أغسطس واتجوزوا وأوقات كتير كنت بحس إنها عصبية زیادة عن اللزوم، وأي حد كان بيكلمها كانت بتشخط وتزعق بس كانت طيبة، وكانت بتضرب الأطفال كأول رد فعل ليها لما يعملوا حاجة غلط، وهما كانوا بينزلوا يقعدوا معانا كل يومين نتغدى سوا ونقعد سوا.
وتابعت: في يوم كانوا عندي وقالتلي جودي فيها قمل كتير جدا في دماغها، فقولتلها ابعتي هاتيها أشوفها فجابتها فلقيت فيها حرارة في قورتها وفي دماغها فقولتلها روحي بيها مستشفى الحوض المرصود الصبح بتاع الجلدية يكشفوا على البنت، ويدوها حاجة ليها تنشف شعرها فمرحتش بيها فجبتلها ماس من الصيدلية ومرهم مضاد للفطريات، وقولت لزينب تديهولها وقالتلي اديتها بس لقيت الحبوب بتزيد وبقى الموضوع صعب معاها فخدتها وروحت للحلاق علشان يخففلها شعرها علشان أقدر إن أنا أحطلها كريمات عشان موضوع میزيدش في شعرها، وحطيتلها كريمات وبدأ فعلا الحاجة تخف خالص.
وأردفت: وبعدين في يوم كنت رايحة أزور العيال فلقيت جودی ودنها الشمال وارمة فسألت زینب ايه اللى مورم ودن بنتك كده؟، قالتلى جودی وقعت کيس سكر وغرقت نفسها فأنا ضربتها بالشبشب على ودنها قامت جودي قالت لا يا ستی هي ضربتنى بالحزام على ودنی، فأنا قولت لزينب متضربیش بنتك تاني ولو ضربتيها متقعدیش معانا تاني وبعدها بفترة جتلى ولقيت دراعها ملفوف عليه رباط ضاغط سألتها قالتلى كانت بتلعب مع العيال ووقعت.
واختتمت حماة المتهمة بقتل ابنتها جودي: بعد حوالي أسبوع في تاريخ يوم 19 فبراير 2020، الساعة 9 الصبح لقیت زینب بتكلمني في التليفون بتقولى جودی بقلبها مبتردش عليا، والخط اتقطع وعرفت بعدها من سامح إن البنت تعبانة وفي غيبوبة ولما سألت سامح إيه اللي حصل البنت كانت صاحية جعانة والأنبوبة فاضية فأمها خبطتها فراحت المستشفى وده كل اللي أعرفه.
