وقع فجأة وجاله تشنجات|وفاة شاب خلال لعب مباراة كرة قدم.. وصديقه يكشف التفاصيل
تصدر اسم الشاب عبد الرحمن علي ترند منصات التواصل الاجتماعي، بعد وفاته خلال لعبه مباراة كرة قدم مع أصدقائه، مما دفع الجميع يشارك بمنشورات للتصدق على روحه.
وقع فجأة وجاله تشنجات.. وفاة شاب أثناء لعبه مباراة كرة القدم
وفي هذا السياق، أكد صديق عبد الرحمن علي لـ القاهرة 24، وفاته خلال الساعات الماضية في أثناء مباراة كرة قدم في أحد الملاعب الرياضية، قائلًا: أنا كنت معاه في الماتش لحظة الوفاة، ومحصلش أي حاجة هو لعب نصف ساعة ومعملش مجهود كبير، لكن وقع مرة واحدة من غير أي حاجة.
وأضاف صديقه: جاله تشنجات شديدة وحاولنا نساعده ونفتح بوقه عشان نشوف بلع لسانه ولا لأ بس كان بوقه مقفول جامد، حاولنا نطمن إنه مش بالع لسانه ورشينا مياه عليه مفيش فايدة، والكلام ده كله خد دقيقتين مش أكتر.
هبوط حاد في الدورة الدموية.. سبب الوفاة
وأكمل صديق الشاب المتوفى: بعد كدة شيلناه وروحنا أقرب مستشفى دخل جوا ساعة إلا تلت وبعدها توفي، وأول ما دخل الطوارئ اتقال لنا مش هتعرفوا حاجة قبل 40 دقيقة وبعد كده قالوا هو متوفي من نصف ساعة أصلًا.
وأردف صديق الشاب: كلمنا والدته وأخوه، لكن طبعًا مكنش حد ينفع يدخله، والأطباء كانو بيحاولو معاه جوا، واللي اتقال في الآخر أنه هبوط حاد في الدورة الدموية.
وأوضح صديق الشاب أن عبد الرحمن كان شخص رياضي وفي حالة صحية جيدة، قائلًا: مكنش بـ يعاني من أي أمراض وكان رياضي بينزل الجيم ومحافظ على صحته، ومكنش بـ يشرب أي حاجة.
واختتم: إحنا كل اللي محتاجينه بس الناس تفتكر عبد الرحمن بالخير وتترحم عليه مش أكتر، قدر الله وما شاء فعل، وإحنا مؤمنين بـ كدة.
ويُذكر أن اسم عبد الرحمن علي الشاب الذي يبلغ من العمر 22 عامًا، حاصلًا على شهادة التخرج من كلية البايوتكنولوجي من جامعة القاهرة لهذا العام 2024، تصدر الترند عبر منصات التواصل الاجتماعي، بعد وفاته خلال لعبه مع زملائه مباراة كرة قدم.
