اتقفل بسبب عدم الإقبال│ القصة الكاملة لـ لافتة منع الألفاظ الخارجة داخل مقهى.. ومالكه: بحلم أفتحه تاني
تداول مُستخدمو منصة فيسبوك للتواصل الاجتماعي صورة لـ لافتة مُعلقة على باب أحد المقاهي بـ عنوان “ممنوع الألفاظ الخارجة”، مع ذكر عدة شروط مُرتبطة بالهدوء وإلزام تأدية الصلاة في مواقيتها المُنضبطة، لكن كشف المالك الحقيقي لهذا المكان عن حقيقة هذه اللافتة التي تصدرت تريند منصات التواصل الاجتماعي.
على باب مقهى.. القصة الكاملة لصورة متداولة بـ ممنوع الألفاظ الخارجة
غير مسموح بالألفاظ الخارجة.. هكذا كانت بداية الكلمات المُعلقة على بوابة Study zone cafe، الموجود بمنطقة مدينة الطور في جنوب سيناء، مما تداول في صورة لهذه اللافتة عبر المنصات، ومن جانبه كشف عبد الله الأسواني مالك هذا المقهى في تصريحات خاصة لـ القاهرة 24، عن أن هذه اللافتة كانت مُعلقة بالفعل على بوابة المقهى، لكن تم غلقه منذ العام الماضي، بسبب عدم الإقبال على المكان.
وقال عبدلله الذي يبلغ من العمر 30 عامًا وحاصل على ليسانس من كلية الآداب جامعة المنصورة، إن المقهى تم غلقه منذ العام الماضي بسبب الأزمات المادية الناتجة عن عدم الإقبال عليه، قائلًا: طبعًا الأرزاق من عند ربنا، لكن الشروط بعدم ذكر الألفاظ الخارجة ومنع التدخين والسلوكيات الغير حميدة كانت سبب في أن الإقبال ميكونش كتير شوية.
صاحب المكان: حلمي أفتح المكان تاني
وأضاف الأسواني: للأسف المكان اتقفل.. وأنا بحلم بـ إني أفتحه تاني، عشان يكون في مكان مناسب لشباب وبنات الجامعات، يلاقوا مكان يقعدوا فيه براحتهم مع الحفاظ على السلوك الراقي وقيم المجتمع المصري.
وتابع: والأسر لما حد يكون خارج مع أولاده يلاقي مكان يقدر ينبسط فيه وبردو الأولاد الصغيرين ميكونش خايف عليهم يشوفوا اي شئ غير لائق أو يسمعوا ألفاظ خارجة تؤثر على سلوكهم، موضحًا تشجعيه للأطفال على الانضباط في مواقيت فروض الصلاة، قائلًا: اللي كان بيلعب والآذان يؤذن كان يقوم يصلي واديلو وقت زيادة يلعب فيه من غير فلوس.
صاحب المكان: التدخين كان ممنوع تماما
وأوضح الأسواني خلال حديثه: التدخين كان ممنوع تمامًا عشان صحة الجميع، واللي كان بيقول ألفاظ خارجة كنت بأكد عليه مرة أنه ممنوع وبعدين متتكررش تاني، واللي عنده اصرار إنه يغلط كان بيسيب المكان من نفسه لإني مكنتش بسمح بكده، لأن كان في شباب بعضهم بيدخن وبعضهم عايز يقعد براحته ويقول ألفاظ خارجة عادي من غير ما حد ينبه عليه أن ممنوع.
وقال: المكان اتفتح في 2022، وكان في خدمات انترنت وأماكن مخصصة للعب بلايستشن والأكل والمشروبات والقراء والمذاكرة، وحلمي أفتح المكان من تاني.
