التربي في واقعة سحر مؤمن زكريا: كنت بزرع صبار ولقيت طلاسم فيها دبابيس وكلمته عشان يشوفها | انفراد
يواصل القاهرة 24، نشر نص تحقيقات قضية فبركة السحر والأعمال السفلية للاعب مؤمن زكريا، من أجل تحقيق مكاسب مالية.
أقوال التربي في واقعة سحر مؤمن زكريا
واستمعت جهات التحقيق لأقوال التربي - المتهم الأول في واقعة فبركة سحر مؤمن زكريا، والذي قال: اللي حصل إني شغال تربي في مقابر سيدي عقبة في الخليفة، وفي يوم كنت بزرع صبارة في الترب مرة واحدة، ووأنا بحفر لقيت كيس بلاستيك فمسكته وفتحته عشان أشوف فيه إيه لقيت فيه لفتين، وبفتح أول لفة لقيت مكتوب فيها طلاسم وحاجات مش مفهومة، واللفة التانية بفتحها لقيت فيها ثلاث ورقات بيض مكتوب عليها كلام مش مفهوم وفيها صورة كابتن مؤمن زكريا، والصورة مكتوب عليها بالأحمر كلام مش مفهوم ومدبس فيها أكثر من دبوس ومكتوب عليها بالأحمر، وساعتها أنا صورتهم بالتليفون محمد جوز أمنية.
التربي: كنت بزرع صبار ولقيت طلاسم فيها دبابيس
وأضاف التربي في واقعة فبركة سحر مؤمن زكريا: اتصلت بمحمد أ قريبي وقلتله على اللى أنا شفته وساعتها هو قالي إنه يعرف حد يوصلني بالكابتن مؤمن زكريا، وبعد كده لقيت واحد اسمه مصطفى ومعاه واحد صاحبه وقالي إنه قریب مرات مؤمن زكريا، وساعتها طلب مني إنه يشوف الأعمال اللي أنا شوفتها في المدفن، فوريتهاله وقالي إن مرات مؤمن زكريا هتتواصل معايا، وبعدها بيومين لقيت كابتن مؤمن زكريا واتنين شيوخ وأبو مؤمن زكريا ومصطفى والشيوخ قدامي.
وأردف التربي المتهم في واقعة سحر مؤمن زكريا: طلبوا مني أجيب الأعمال عشان يشوفوها وبعدها قعدوا يطلبوا مني خل ومايه وسلطانية على أساس أنهم بيفكوا الأعمال، وبعد كده طلبوا مني أنهم يشوفوا المكان اللي أنا لقيت فيه الكيس ده وريتهلهم والشيخ طلب منى أحفر شوية كمان وطلع ساعتها من الحفرة اللي جنب التربة حتتين فخار وسلك، وبعد كده حط زرعة الصبار وسقاها بمية مقري عليها قرآن.
وأضاف المتهم في واقعة سحر مؤمن زكريا: بعد كده مشيوا لقيت محمد.ع بيقولي إنه صورنا واحنا بنفك العمل وساعتها أنا طلبت منه إنه يمسح أي حاجة صورها عشان مينفعش تتاجر بمرض حد، وبعدين وتاني يوم وأنا رايح أجيب علاج من الصيدلية لقيت الصيدلي بيقولي أيه موضوع مؤمن زكريا؟ قولتله إنه كان فيه أعمال ليه في الترب وفيه شيخ جه فكها وساعتها الصيدلي بيقولي أنا مصدقك.
وأكمل المتهم في واقعة سحر مؤمن زكريا بالتحقيقات: ساعتها رحت طلعتله الصور اللي كنت مصورها للأعمال والدكتور ساعتها طلب مني أبعتله الصور فبعتهاله بحسن نية، وبعد كده لقيت حد بيتصل بيا وبيقولي أنه هو جاري وبيسألني على موضوع مؤمن زكريا فحكيلته وبعدها على طول لقيت المكالمة اللي كانت بيني وبين الراجل ده، ويوم السبت اللي فات لقيت رئيس المباحث بيتصل بيا وبيقولي أنا عند البيت عندك.
وواصل المتهم في واقعة سحر مؤمن زكريا بالتحقيقات: وقالي عاوزك تيجي لي حالا وفعلا أنا رحتله عند البيت وقالي إيه ياعم اللى إنت عامله؟ قلتله أنا معملتش حاجة وطلب مني إني أوريله مكان الحفرة اللي كان فيها الأعمال فوريتهاله وحكيت له على كل اللي حصل، وبعد كده راح أخدني وركبني ميكروباص وطلعنا على قسم الخليفة، وفي القسم طلعت وحدة المباحث وفضلت قاعد في المباحث، وبعد كده لقيتهم نزلوني الحجز وبعدها جابوني على النيابة وهو ده كل اللي حصل.
