ميدو عادل: الشغل رزق زي الصلاة والصحاب
كشف الفنان ميدو عادل، عن رأيه في عرض الأعمال الدرامية خارج السباق الرمضاني، موضحًا أنه ليس حريصا على المشاركة في الأعمال الرمضانية ولكنه حريص على المشاركة في الأعمال الفنية بشكل عام بسبب حبه الكبير للفن.
وقال ميدو عادل، في لقائه مع القاهرة 24: كل حاجة بتاعت ربنا وفي حاجات برا رمضان بتنجح جدًا أو تفشل، وفي حاجات بتنجح جوا الموسم الرمضاني وممكن تفشل، أصل الشغل ده رزق زي أي نعمة ربنا أداها لينا وزي الصلاة والصحاب، فأنت بتحاول تعمل اللي عليك على قد ما تقدر علشان تحس أنك أخلصت، ولو أخلصت هتنام وأنت مطمن.
أما عن حرصه على المشاركة في الأعمال الرمضانية، فعلق ميدو عادل: مبيهمنيش حاجة غير أني أشتغل الشغلانة اللي بحبها، وأنا مبحبش في حياتي أكتر من الفن.
ميدو عادل: بحب المسرح أكتر من أي حاجة في الدنيا
كما تحدث ميدو عادل، في تصريحاته السابقة لـ القاهرة 24، عن علاقته بالمسرح، قائلًا: أنا طول الوقت بشتغل مسرح من صغري ومفيش سنة بتعدي من غير ما أشتغل مسرح، والسنة دي عندي مسرحية للطفل وكمان مسرحية روميو وجولييت فنشاطي المسرحي كبير، فأنا مبسوط جدًا وبحب المسرح أكتر من أي حاجة في الدنيا، وبحاول أوازن بين المسرح والتليفزيون والسينما.
