سيدة تشكو من خدمة ما بعد البيع بشركة LG: عايزة أبدل شاشة فيها عيب صناعة ورفضوا
تقدمت سيدة تدعى راندا خلف خليفة، من منطقة حلوان بالقاهرة، بشكوى لجهاز حماية المستهلك، حتى تتمكن من تبديل شاشة تليفزيون LG، حيث وجدت بها عيب صناعة والشركة ترفض استبدالها.
شكوى من خدمة ما بعد البيع لشركة LG
وقالت راندا خلف خليفة، من منطقة حلوان بالقاهرة، اشتريت شاشة تليفزيون نوعها LG 75 بوصة بـ 33 ألف جنيه، من محل أدوات كهربائية في منطقة وسط البلد، يوم 6 سبتمبر الماضي، وركبتها وشغلتها، وظهر فيها إضاءات باللون الأبيض.
وتابعت راندا خلف خليفة، في تصريحات لـ القاهرة 24، أول ما ركبت شاشة LG وشغلتها لقيت فيها ليدات ظاهرة باللون الأبيض ومش مطفية، وكانت عاملة ضوء أبيض، اتصلت برقم خدمة ما بعد البيع الخاص بشركة LG، وقالولي هنبعت ليكي فني يفحص الشاشة.
واستكملت راندا خلف خليفة، صاحبة الشكوى، تاني يوم الفني وصل وفحص الشاشة، وقالي رجعيها للتاجر اللي اشتريتي منه الشاشة أفضل، لإن فيها عيب صناعة من الشركة، ومع الوقت هيزيد، رجعت لـ التاجر وقالي لا دي سليمة، والشركة رجعت اتصلت بيا وقالتلي الفني قال إن الشاشة سليمة، ولكن هو قال كدا عشان كان عايز ياخد بدل الزيارة 200 جنيه والشركة قايلة قبل ما يجي إنه مفيش مقابل مادي أو مصاريف لزيارة الفني.
وأضافت راندا خلف خليفة، قدمت شكوى في حماية المستهلك يوم الخميس الماضي، وقالولي هنرد عليكي بعد 5 أيام، وأنا كل اللي محتاجاه تبديل الشاشة، لإن لما كلمت خدمة العملاء رفضوا التبديل، وقالولي اللي عايزة تعمليه اعمليه.
