بعد 15 يومًا من البحث.. الحزن يخيم على أسرة شاب بسوهاج لقي مصرعه في مياه النيل
خيم الحزن الشديد على أسرة شاب يُدعى عبدالرحمن جمال زكي يبلغ من العمر 16 عامًا، بقرية بناويط التابعة لمركز المراغة شمال محافظة سوهاج، والذي لقى مصرعه غرقًا داخل مياه النيل أثناء عمله في جمع الخردة بمحافظة أسوان.
الحزن يخيم على أسرة شاب بسوهاج لقى مصرعه في مياه النيل: مش لاقيين جثمانه
وأكدت أسرته أنه غادر القرية منذ 15 يومًا، وعقب سفره إلى أسوان بيومين، جائهم خبر وفاته غرقًا بعد يومين من سفره، وأثناء عمله استقل عبارة نهرية ولقى مصرعه غرقًا.
وقال والده الحاج جمال زكي، 55 عامًا، إن ابنه المذكور سافر إلى أسوان بحثًا عن لقمة عيشه والعمل في جمع الخردة مع عدد من أقاربه وكان يساعده في مصروفات المنزل.
وأضاف والده لـ القاهرة 24: كان بيساعد معايا في مصاريف البيت وكان بيساعد أخته في مصاريف المدرسة، وكان دراعي اليمين اللي خسرته طول عمري ومش عارف حتى آلاقي جثته لحد النهارده عشان أدفنه وقلبي يرتاح شوية.
وأوضح عم الغريق، أن والده يعاني من مشاكل صحية ويتولى عبد الرحمن الإنفاق على أسرته المكونة من 5 أشخاص وكان هو العائل الوحيد لهم نظرًا لظروف والده الصحية.
وأضاف: إحنا مش عارفين إيه اللي حصل غير إن عبدالرحمن كان راجع من جمع الخردة وكان معاه 2 صغيرين، ورجعوا اللي معاه بالعربة المارو وهو مش معاهم وقالولنا غرق في النيل ومن يومها واحنا بندور عليه على جثته في مياه النيل مش لاقيينها.
وأشار عم الشاب الغريق إلى أن عملية البحث عن الجثة استمرت على مدار 15 يومًا منذ لحظة الغرق حتى اليوم دون العثور على الجثة.
وأضاف: نفسنا نلاقيه في أي وضع مهما كان عاوزين قلب أمه يرتاح وتعرف اللي حصله، وندفنه في مدافن الأسرة إحنا قلوبنا بتتقطع عليه.
