نجوى إبراهيم للمحجبات: خلّي عندك فرامل ومتبقيش محجبة وتمشي بـ بنطلون محزق
وجهت الإعلامية نجوى إبراهيم، رسالة للسيدات بشأن كيفية حفاظهن على مظهرهن وخاصة السيدات المحجبات، مؤكدة أنه يجب على السيدات التحكم في المظهر بما يتناسب مع الحجاب، والوقار.
وقالت نجوى إبراهيم في تصريحات إذاعية: كبرياء الست في مظهرها، مش لازم تبقوا كرماء في المظهر وإظهار المفاتن، نقفل شوية نفسنا لأن الستات لازم لها فرامل في مظهرها، لازم تعملي اختبار قبل ما تخرجي وتشوفي الزوايا، خليكي بخيلة ومتمشيش في الشارع محجبة ولابسة بنطلون محزق وبلوزة قصيرة وانتي 150 سم و100 كيلو.
وأضافت نجوى إبراهيم: في واحدة محجبة زعلت مني لما قولتلها إنتي محجبة ولابسة بنطلون أبيض بس شفاف، وقالت إني مبحبش المحجبات، أبدًا والله يا رب نتحجب الصبح.
نجوى إبراهيم
ومن ناحية أخرى، سبق وأن كشفت نجوى إبراهيم عن رأيها في الأبناء الذين يرسلون والدهم أو والدتهم إلى دار المسنين بسبب انشغالهما، حيث قالت في برنامجها الإذاعي: ساعات نقول هنشاهد اليوتيوب، ونلاقي الناس مطلعة فيديوهات شاهد فلان أدخل والدته دار المسنين، موضوع علاقتنا بدار المسنين ممكن يكون إيجابي جدا، أنت أو إنتي مش فاضيين مسافرين أو عندكم شغل، ووالدتك مش لاقية حد يتكلم معاها فتودوها دار المسنين، أو حتى لو تعبانة هيكون معاها ممرضة وأيضًا ونس صديقة في المكان.
وواصلت: لكن لو أنت قادر إنك تاخد مامتك في حضنك وتبقى جنبك يبقى أفضل، لأن كل دقيقة هي جنبك وأنت حاسس بيها وبتتنفس أنت مالك الدنيا كلها، الحاجات دي مهمة جدا، قبل ما تندموا حيث لا ينفع الندم، أنا لا جاية أنكد ولا أشعلل النفوس، أهم حاجة التعامل.
