ودوا أمهاتكم دار مسنين.. أول تعليق من نجوى إبراهيم على تصريحها المثير للجدل | خاص
علقت الفنانة والإعلامية نجوى إبراهيم، على جدل التصريح المتداول لها، حول إيداع الأمهات دور المسنين، مما تسبب في حالة غضب بين المتابعين على مواقع التواصل الاجتماعي.
وقالت الفنانة نجوى إبراهيم في تصريح خاص لـ القاهرة 24: الكلام المنتشر متاخد جزء صغير منه، عشان يتعمل منه تريندات، وأنا مطلبتش ولا قلت ودوا أهلكم دار مسنين لأن ده ميصحش دينيًا ولا أخلاقيا.
وتابعت نجوى إبراهيم: مينفعش تجيبوهم تبهدلوهم في البيت وتسيبوهم للشغالين وهما كبار، ساعتها ودوهم الدار أفضل.
نجوى إبراهيم تكشف رأيها في إيداع الأمهات بدور المسنين
وكانت نجوى إبراهيم تحدثت عن رأيها في الأبناء الذين يرسلون والدهم أو والدتهم إلى دار المسنين بسبب انشغالهما، حيث قالت في برنامجها الإذاعي: ساعات نقول هنشاهد اليوتيوب، ونلاقي الناس مطلعه فيديوهات شاهد فلان أدخل والدته دار المسنين، موضوع علاقتنا بدار المسنين ممكن يكون إيجابي جدا، أنت أو انتي مش فاضيين مسافرين أو عندكم شغل، ووالدتك مش لاقية حد يتكلم معاها فتودوها دار المسنين، أو حتى لو تعبانة هيكون معاها ممرضة وأيضًا ونس صديقة في المكان.
وتابعت نجوى إبراهيم: لكن لو أنت قادر إنك تاخد مامتك في حضنك وتبقى جنبك يبقى أفضل، لأن كل دقيقة هي جنبك وأنت حاسس بيها وبتتنفس أنت مالك الدنيا كلها، الحاجات دي مهمة جدا، قبل ما تندموا حيث لا ينفع الندم، أنا لا جاية أنكد ولا أشعلل النفوس، أهم حاجة التعامل.
