سيمون: مدحت صالح سبب شهرتي.. وعمري ما اخترت أكون فنانة
تحدثت الفنانة سيمون، عن علاقتها بالفنان مدحت صالح، مؤكدة أنه كان السبب الرئيسي في شهرتها عن طريق الصدفة، كما أوضحت أنها دخلت الوسط الفني عن طريق الصدفة البحتة.
وقالت سيمون، في تصريح خاص لـ القاهرة 24: مدحت صالح كان سبب شهرتي بالصدفة، لأننا كنا في الجامعة وبنعمل عمل خيري وهو اتأخر وأصحابي قالولي اطلعي كده غني ومكنتش محترفة غناء، ولما غنيت حد شافني واكتشفني ووداني لأستاذ طارق كاشف ومن هنا كانت بدايتي الفنية، وقولت لمدحت صالح أنت سبب شهرتي لو مكنتش اتأخرت مكنتش طلعت.
واستكملت سيمون: ده بيوريكي إنك بترسمي طريق وبتفكري تعملي حاجة تانية ودراسة مختلفة وفجأة نلاقي نفسنا في حاجة تانية، أنا عمري ما اخترت أبقى فنانة يمكن لو قولتيلي هتبقي إيه كنت هقولك أبقى رياضية كان زماني دلوقتي بلعب سكواش دوليًا.
سيمون: المغني لما بيمثل بيلغبط الناس
وسبق وأن تحدثت الفنانة سيمون، عن استكمالها مشوارها الغنائي بجانب دخولها مجال التمثيل: أنا الفن كله جالي صدفة، بس أنا من صغري اتعلمت إني أجتهد فيما أفعل، والصدفة جابتلي الغنا والتمثيل مع بعض، والمجال نفسه جه في أولى جامعة، أنا عمري ما كنت أتخيل أني هكون فنانة والموضوع كان صدفة، اللي خلاني أكمل في الغنا مع التمثيل إن قوة الأعمال اللي بتتعرض عليا بتخليني مقدرش أرفضها.
وأضافت سيمون: أنا من حظي وتعبي أن المشوارين مع بعض، وصعوبته أنك بتحيري الناس، الخلطة دي صعبة جدًا للقائمين على الأعمال أنهم ياخدوني ممثلة ولا مغنية، والموضوع مرهق جدًا وعلى مدار عمري عملت كل الأعمال التمثيلية مع الغنائية ومبطلتش غنا أبدًا.
