إمام عاشور: أنا حاسس إني نيجيري.. وهذه رسالتي لـ دونجا
وجه إمام عاشور نجم الأهلي رسالة خاصة إلى نبيل عماد دونجا لاعب الزمالك، وعبّر عن سعادته بالتتويج بلقب كأس السوبر المصري على حساب الزمالك.
وانتصر الأهلي على الزمالك بنتيجة 7-6 بركلات الترجيح في نهائي كأس السوبر المصري؛ ليحصد اللقب الخامس عشر في تاريخه.
تصريحات إمام عاشور
وقال إمام عاشور في تصريحات تليفزيونية: الواحد بيستنى الماتشات دي والواحد دلوقتي مركز مع النادي الأهلي ومع الجمهور وفي تمريني وماتشاتي وبقولهم مبروك ومستنيينكم في ماتش العين وهارد لك للزمالك ولجمهوره.
وأضاف: كهربا أقرب واحد ليا والواحد مهما يتكلم عنه الناس مش هتديله حقه واحنا أهديناله البطولة والحمدلله ربنا كرمنا ونفرح معاه في مصر.
وأشار إمام عاشور خلال تصريحاته: ألف مبروك لـ الأهلي والجمهور لقب السوبر ووصلنا كتير وضيعنا كتير وكلنا كان واثقين في بعض مكنش ينفع غير اننا نكسب بنلاعب فريق قوي زي الزمالك بنقولهم هارد لك واللاعيبة رجالة من أول لآخر دقيقة وليهم حق يفرحوا.
ووجه اللاعب رسالة لـ دونجا قائلًا: فيه لاعيب بيتكلم عليا وبيقول ميعرفنيش، أحب أقوله انت كنت بتجيلي دورات رمضان وتاخدني عشان أخليك تكسب والواحد زعلان ليك وربنا يعديك من الأزمة اللي انت فيها على خير، دي لعبة وفي الأول والآخر احنا اخوات أنا علاقتي كويسة بكل اللاعبين وبخرج معاهم وبروح واجي.
وعن سر حلقة الشعر، أكد إمام عاشور: بنتي خايفة مني والموضوع ملوش علاقة بأي حاجة، أنا معنديش غير واتساب واللي يقول يقول واللي يتكلم يتكلم واحنا اتعودنا على كدة احنا في مصر والناس بيتعاملوا مع السوشيال ميديا غلط في مصر وفي ناس مبتستحملش السوشيال ميديا واتقوا ربنا في اللاعيبة اللي بتتكلموا عليها ولازم لما الواحد ييجي ينتقد حد يبقا فيه احترام والواحد بيشوف حاجات مينفعش تحصل ف الأول والآخر دي كورة ولعبة وهل اللي بيشتمني هيستفاد حاجة؟، لكن براحتك انت حر.
وأتم إمام عاشور تصريحاته قائلًا: أنا حاسس إني نيجيري لكن أنا مصري وسلامي للعميد.
