لأول مرة حسام حبيب يكشف كواليس حلاقة شيرين عبد الوهاب لـ شعرها: كان هيغمى عليا| خاص
تصدر مشهد حلاقة شيرين عبد الوهاب لـ شعرها، محركات مواقع التواصل الاجتماعي نهاية عام 2021، وبعد مرور 3 سنوات، كشف حسام حبيب طليق المطربة، تفاصيل وكواليس هذا المشهد.
حسام حبيب يكشف لـ القاهرة 24 كواليس حلاقة شيرين عبد الوهاب لـ شعرها
وفي تصريحات حسام حبيب لـ القاهرة 24، أوضح: قسما بالله العظيم ودي أول مرة هقول الكلام ده، يوم حلاقة الشعر ده سابت البيت وقالتلي مش عايزاك تكون ليك علاقة بشغلي، وأنا كدا كدا مليش علاقة بشغلها، قولتلها حاضر، وقعدت 15 يوما بعمل أغاني.
حسام حبيب: قولت لشيرين الأغاني بتاعتي استفذتك فنيا.. دخلت حلقت شعرها
وأضاف حسام حبيب: قابلتها وبسمعها الأغاني وفي واحد صاحبي قاعد معانا في الاستوديو راحت معيطة عياط رهيب، وقالتلي أنت مش واخد بالك مني أنت أناني ومركز في نفسك، قولتلها مش أنتي اللي قولتيلي ملكش دعوة بيا، قالتلي حتى لو قولتلك كدا أنت فين شغفك عليا، واتسحبت من لساني قولتلها الأغاني اللي أنا عملتها استفذتك فنيا يعني؟.
واستكمل حسام حبيب: شيرين عبد الوهاب زعقت شوية، بعدها دخلت أنام وصحيت ملقتهاش في البيت، فضلت أدور عليها 3 أيام معرفش هي فين، لحد ما اكتشفت أنها قاعدة في أحد الفنادق عند حد مش هعرف أقول اسمه، ومع ذلك الشخص ده كلمني وقالي تعالى وصالحوا بعض.
وأكمل حسام حبيب: روحتلها وأنا مضايق جدا بس قولت أروح ألم الموضوع وبعدين نتحاسب، والموضوع خلص، وبعدها واحدة صاحبتها قالتلي خد بالك من فلان مع إنه صاحبي، قولتلها ليه، قالتلي بيوقع بنيك وبين شيرين، وهي بتقول كدا شيرين كانت داخلة من الأوضة وقالتلي هو أنت جاي هنا تقرفنا، احنا قاعدين مبسوطين.
وختم حسام حبيب تفاصيل وكواليس حلاقة الشعر، قائلا: قولتلها أنتي بتتكلمي كدا ليه، قالتلي أنا أتكلم براحتي، قولتلها يا شيرين كملي اللي بتعمليه وسبينا نتكلم، راحت شتماني شتيمة جامدة، وحدفتني بحاجة، وقالتلي طلقني يا كذا، قولتلها بصي خشي ألبسي، ويلا هنروح نطلق، قالتلي أنا مش هنزل أنا شيرين عبد الوهاب يا بابا، قولتلها أنا بكلم شيرين مراتي، وزعقت وصرخت وقالت مش هنزل، سبتها وطلعت أقعد بره، ودخلت الحمام افتكرت أنها دخلت تغير هدومها، لاقتها حلقت شعرها، وقسما بالله وقعت على رجلي في الأرض وكان هيغمى عليا، وخرجت تقول للناس حسام حلقلي شعري.
