كنت سجادة لها| حسام حبيب لـ القاهرة 24: كرهت نفسي بسبب شيرين عبد الوهاب.. والناس لازم تعرف أنها متناقضة
رد المطرب حسام حبيب على اتهامات طليقته الفنانة شيرين عبد الوهاب، معربا عن استياءه الشديد بسبب هجوم الجمهور عليه على خلفية أزمته الأخيرة مع الفنانة.
وقال حسام حبيب في تصريحات خاصة لـ القاهرة 24، على هامش أزمة الفنانة شيرين عبد الوهاب وابنتها، الأخيرة: أنا في صدمة ومش مجمع اللي بيحصل، بس أنا عايز أبدأ كلامي بكام حاجة، وهي أن في ناس كتير واخدة عني فكرة مش حلوة، ومطلعتش أدافع عن نفسي ولا مرة وكنت منتظر أنها تطلع تدافع عني، هي طلعت مرة من خلالكم وقالت إن حسام مخدش مني حاجة ولا سرق مني حاجة.
حسام حبيب: شيرين عبد الوهاب متناقضة
وأضاف حسام حبيب: هي قالت على الهواء قدام الناس كلها أني سرقت منها، بس عشان الناس تعرف أنها متناقضة، ولسه من كام يوم، قالت إن حسام ده ظهري وأهلي وكويس ومعرفش ايه، وأنا بتكلم وأنا قلبي متقطع عشان محبش أتكلم عن شيرين بالشكل ده، وهتفضل مكانتها عندي زي ماهي بس أنا المرادي هدافع عن نفسي بس مش عشاني، عشان ورايا أهل وعائلة محترمة، ساءت سمعتهم بسبب اللي شيرين بتعمله.
وواصل حسام حبيب: كنت متنظر أن شيرين تديهم حقهم وتديني حقي، مش عشان حاجة، عائلتي فيها بنات ورجالة محترمة ومينفعش أنا أجيب لهم كلام زي ده، ومكنتش بطلع أتكلم عشان غلاوتها عندي، ومقبلش أنها تطلع كذابة.
حسام حبيب: كرهت نفسي بسبب شيرين عبد الوهاب
وختم حسام حبيب: بدأت أكره نفسي بسبب الحب، اللي بيحب دلوقتي بيتشاف حرامي وبيتشاف منافق وتوكسيك، أنا نرجسي؟ أنتم يا جماعة قرأتوا أعراض النرجسية ايه، أنه يكسر اللي قدامه ويجيبه عشان يفضل يمتلكوا، أنا كنت عامل لها نفسي سجادة، مش بتاع فجل أنا، واللي بيقولوا أني أتجوزت شيرين عشان شهرتها، يا سيدي خدت من شهرتها وبقيت زيها، على الأقل كنت هعمل أغنية كل شهر وكنت هكسب فلوس كتير، بس أنا مفكرتش في نفسي ولا عائلي، كنت أناني أني أديت طاقتي كلها لواحدة داست عليا، بقت عايزة تقول الحقيقة والناس مش مصدقاها.
