بعد عودته من الحج| عم ربيع لـ القاهرة 24: دعيت ربنا أزور فلسطين.. ونفسي ديوني تتسدد
قال عم ربيع صاحب تريند إلقاء البرتقال الشهير لشاحنات المساعدات إلى غزة بعد عودته من الأراضي المقدسة بالسعودية، لإتمامه مناسك الحج، إنه يتمنى زيارة فلسطين، ويرغب في سداد ديونه.
أول ظهور لـ عم ربيع بعد عودته من الحج
وأضاف عم ربيع خلال بث مباشر لـ القاهرة 24: جيت بالسلامة من الحج وازداد حب الناس ليا سعوديين وناس مكنتش أعرف لغتهم كانوا مرحبين بيا وعارفيني، واللي يسعدني أكتر نصرة فلسطين وأتمنى لمصر السلامة والرقي.
واستكمل الحج ربيع: جالي رسايل كتير من أهل فلسطين.. أنا عاوز لهم النصر والأمان وبقولهم أنا كلي ليكم لكن لا أملك إلا الدعاء.
عليا 80 ألف جنيه
وتابع: وانا برمى البرتقال مكنتش حاسس بأي حاجة لكن اتفاجأت بعدها بحب الناس، أنا كنت مديون وعليا دلوقتي 80 ألف جنيه.
وواصل: نفسي يكون عندي استقرار في تجارتي..الناس عملت أزمة بسبب الحج وطلعوا عليا إني بقى عندي فيلا وعربية، مضيفًا: أنا خايف من الشهرة والغنى أنا بس عاوز أعيش مستور.
وأكد عم ربيع: ربنا عوضني بزيارة البيت الحرام والمسجد النبوي.. وعاوز ربنا يسدد ما عليا وكل اللي ليه عندي جنيه هرده وابوس على راسه.
وأكمل: كان نفسي أحط كل ما أملك لغزة، دعيت ربنا عند المسجد النبوي أشوف فلسطين منتصرة حرة مستقلة وعاصمتها القدس، دا كل اللي أتمناه من ربنا.
وأتم: بقول للي بيقول أنا معنديش حاجة أساهم بيها لفلسطين، معاك صحتك وفلوسك لازم تحس باخواتنا الفلسطينيين..وأنا خدام أي حد يعوزني عمري ما أقول لاء لحد، مختتمًا حديثه: نفسي أسدد ديوني ومحدش يخبط بابي ويقولي عندك فلوس.
ووصل عم ربيع إلى القاهرة منذ قليل، بعد إتمام مناسك الحج في الأراضي المقدسة بالسعودية.
