لاعب الزمالك: مستقبلي بيضيع ومجلس الزمالك يتجاهلني ولا يرد على مكالماتي
عبر يوسف حسن مهاجم الزمالك عن غضبه مما يحدث معه في الفترة الحالية وتجاهل مسؤولي الزمالك له وعدم الرد علي مكالماته وتعرضه للظلم.
وكتب اللاعب عبر صفحته على موقع التواصل الاجتماعي فيسبوك: أنا هتكلم بس مش عايز جمهور الزمالك يزعل مني في أي حاجة، أنا بسبب اللي بيحصل معايا ده هبطل كوره بالشكل ده أنا لا بتأهل ولا بتدرب ومستقبلي بيضيع.
وأضاف اللاعب قائلا: أنا الكورة هي شغلي وأكل عيشي ومش عارف أنا أذنبت في إيه ولا عملت إيه عشان اللي بيحصل معايا ده، عمر ما حد شاف مني حاجة وحشة ولا شاف أني بعمل مشاكل أنا ديما فحالي بس الي حصل فيا مش قليل عارف الناس ممكن متصدقش اللي بيحصل معايا بس وحياة الأيام المفترجة دي، أكيد أنتم عارفين موضوع العملية وكده ومحدش كان راضي يعملها من الإدارة، وعملتها بعد مجهود كبير جدا بعد 6 شهور قاعد في البيت، وبتحصل معايا نفس الحاجة بعد ما الإدارة الجديدة وعدوني هنوديك علاج طبيعي أنت لعيب مهم وأنت وأنت وأنت.
وكشف اللاعب عما حدث قائلا: أول شهر ودوني لدكتور علاج طبيعي اسمه خالد الشناوي، رُحت شهر وتنين والنادي مدفعش الفلوس لدكتور العلاج الطبيعي، وكل شوية هو يقولي ويطلب فلوسه، طبعا أنت اتكسفت أني أروح تاني العلاج الطبيعي أنا بقالي 3 شهور يعتبر قاعد في البيت.
وقال اللاعب: وحياة ربنا وحياة ربنا ما حد عبرني بمكالمة تليفون، ولا حد بيرد عليا أصلا، حسبنا الله ونعم الوكيل في كل ظالم، أول مرة اشوف كده اول مره أشوف ظلم ب عيني فعلا، عمري محصلي كده في حياتي، كل ما اروح لحد يقولي اتكلم مع الإدارة، اتكلم يقولوا مش عارف أي مفيش حد وقف معايا نهائي بس غلطتي أني مكنتش بطلع أتكلم.
واختتم اللاعب حديثه: أنتم جايبني بفلوس مش فلوس قليلة مفروض تقدرني مفروض لاعيب منتخب مصر، اللي بيحصل معايا أنا في نادي كبير واسم كبير، وجمهور الزمالك عارف أنا بحبهم إزاي بس أنا اتظلمت كتير وغلطتي أني كنت ساكت مش عايز اتكلم بفكر في مصلحتي، ولما لقيت الناس كلها بتهاجمني أنا ومفكريني أنا اللي قاعد في البيت بمزاجي، محدش يزعل مني أي حد زعلته حقه فوق دماغي أنا بحب جمهور الزمالك.
وكان يوسف حسن لاعب نادي الزمالك قد تعرض لإصابة بقرحة في الكاحل بشهر أكتوبر 2023، ومن وقتها غاب اللاعب عن المشاركة في المباريات وخضع لبرنامج علاجي مطول للتعافي من تلك الإصابة.
