شقيقة رشدي أباظة عن تناوله للخمور: كانت موجودة في كل البيوت ومكنش فيه حد مبيشربش
ردت السيدة منيرة أباظة على انتقادات الجمهور لـ رشدي أباظة، بسبب ما يشاع عنه من كثرة تناوله للخمور، حيث أشارت إلى أن هذا الأمر كان طبيعيًا في عصرهم، كما أكدت أن الراحل كان يداوم على الصلاة ويحرص على أن يؤدي فرائضه.
وقالت منيرة خلال لقائها مع القاهرة 24: أخويا كان مداوم على الصلاة، وحكاية إنه يشرب الخمر، فالزمن بتاعه مكنش فيه حد مبيشربش خمرة، ولا كانت فيه ستات محجبات، والخمرة كانت موجودة في بيوت كل الناس وتقدم في البيوت عادي، لما ندخل البيت كان لازم يكون فيه خمرة، كان بيشرب زي ما كل الناس بتشرب.
تصريحات شقيقة رشدي أباظة
وكانت كشفت منيرة أباظة، شقيقة رشدي أباظة، تفاصيل زواج شقيقها من الفنانة اللبنانية صباح لمدة 24 ساعة، وموقف الفنانة سامية جمال التي كانت على ذمته وقت زواجه من صباح، وقالت شقيقة رشدي أباظة، خلال الاحتفال بمئوية سامية جمال بمهرجان جمعية الفيلم: هي كانت دخلت في وسطنا وأصبحت واحدة مننا، وهي كانت بتعرف رشدي من بصته، هي كانت ست عظيمة جدًا ومثقفة جدًا، بتتكلم لغات كويس جدًا.
واستكملت شقيقة رشدي أباظة: رشدي لما اتجوز صباح كان بيصور معاها فيلم، وتفاجئنا في يوم بـ تليفون من رشدي بيكلم جوز أختي بيقوله أنا جاي دلوقتي حضرلي مأذون، وكنا كلنا متفاجئين إنه هيتجوز صباح وبنقول طب وطنط سامية جمال؟ ومكناش قادرين نتكلم، والخبر كان وصل القاهرة قبل ما يكتبوا الكتاب، سامية كلمت بابا في التليفون وقالتله على كل اللي حصل.
