استغل أغنيتي ورفض يسجلها معايا.. نجل شعبان عبد الرحيم يكشف تفاصيل خلافه مع رضا البحراوي
كشف الفنان عدوية نجل الفنان الراحل شعبان عبد الرحيم، تفاصيل خلافه مع المطرب رضا البحراوي بعد غنائه أغنيته الأخيرة صغير أنا، مشيرًا إلي أن الأخير رفض غنائهما سويا الأغنية.
تفاصيل خلاف عدوية شعبان عبد الرحيم ورضا البحراوي
نشر عدوية شعبان عبد الرحيم مقطع فيديو عبر حسابه الشخصي بمواقع التواصل الاجتماعي أعرب من خلاله عن استيائه من غناء رضا البحراوي أغنيته، قائلًا: عايز أقول لكل الناس إن أغنية صغير أنا، اللي رضا البحراوي بيقدمها بقاله 5 أيام، دي بتاعتي ومن ألحاني، وكلمات إسلام خليل.
أضاف عدوية شعبان عبد الرحيم: رضا البحراوي اتصل بيا واستأذني وقالي عايز أغني الأغنية دي في الأفراح وافقت، ولما لقيته كل يوم بيغنيها مش بيعمل حاجة في حياته غير يغني الأغنية بتاعتي ويستغلها، فطلبت منه ييجي نسجلها مع بعض لكن رفض، وقالي الأغنية دي اتهرست وهو اللي هرسها، وهي بتاعت أبويا بقالها 20 سنة، ولكن أنا زودت عليها حاجة، وموجودة بصوتي على اليوتيوب.
عدوية شعبان عبد الرحيم لـ رضا البحراوي: ملكش دعوة بيا عشان هزعلك
استكمل عدوي عبد الرحيم حديثه قائلًا: بقول لرضا ملوش دعوة بأغنيتي وميغنهاش تاني، أنا بقى أجيب عمرو سلامة أو الجن الأزرق وأي عفريت يغني معايا أنا حر، محدش يدخل في الموضوع ده وأنا مش هقف جنب حد ملوش خير في حد.
عدوية شعبان عبد الرحيم: مش مصدق أن والدي مات ومش معايا
وفي سياق مختلف، تحدث عدوية شعبان عبد الرحيم مؤخرًا عن اشتياقه لوالده، وقال في تصريحاته لـ القاهرة 24: مش مصدق إن والدي مات من 3 سنين وأنه مش معايا، وهو عمره ما هيتعوض، ولو عندي الفرصة أكلمه أو أشوفه لآخر مرة هقول له الحقني من اللي جاي لأن هو وجوده كان أمان لينا، ومهنة الفن لمت من بعده.
وواصل عدوية: شعبان عبد الرحيم هو الفنان الوحيد اللي بيمثل مصر لأن الأغاني بتاعته وطنيه والأوسكار مش كفاية عليه دا المفروض ياخد دكتوراه فخرية لأنه أحسن من الفنانين الأجانب، كفاية رجولته وجدعتنه وحنيته معانا.
