مصطفى شوبير: لو والدي استشارني في إعلان صفقة أبو جبل كنت هقوله استنى المنتخب يخلّص
علّق مصطفى شوبير على قرار والده أحمد شوبير بإعلان صفقة انتقال محمد أبو جبل إلى الأهلي يوم مباراة منتخب مصر مع منتخب الكونغو الديمقراطية في دور الـ 16 من مسابقة كأس أمم إفريقيا.
تصريحات مصطفى شوبير
وقال مصطفى شوبير خلال تصريحات تليفزيونية: كولر جه وقالي أنا هجيب حارس مرمى وبدأ يدوّر بالفعل وأنا مكنتش أعرف مين اللي جي وبعد ما رجعنا من معسكر الإمارات لقيت رامي ربيعة بيقولي أبو جبل جه الأهلي، ولما فتحت السوشيال لقيت أن والدي أحمد شوبير هو اللي أعلن الخبر.
وأضاف: الناس قالت أن أحمد شوبير سبب أن الصفقة تبوظ؛ طب ازاي؟.. هو أعلن الصفقة الساعة 2 وهذا توقيت مش كويس لكنه مأثرش على الصفقة نفسها ومأثرتش على مستوى جبل في الماتش وهو نفسه قال كدة.. طب هل أثرت على الناس اللي بتقرأ الخبر؛ هي الناس بتلعب؟
وأكد مصطفى شوبير خلال تصريحاته: أي إعلامي تاني كان هيبقا في إيده خبر تعاقد الأهلي مع أبو جبل كان هينفرد بيه بس التوقيت مش كويس عموما.
وأشار: لو أحمد شوبير استشارني، كنت هقوله استنى المنتخب يخلّص وقول عشان نركز مع المنتخب مش أكتر يعني ومكنش يُفضّل يقوله في التوقيت دا يعني.
وبالإجابة عن سؤال لماذا فشلت صفقة انتقال أبو جبل إلى الأهلي، قال مصطفى شوبير خلال تصريحاته: مش موضوعي أنا مش إداري.
وتابع: حلمي ألعب في منتخب مصر ويبقا ليا وجود وليا بصمة زي ما حصل في الأهلي، وشرف كبير أبقا مع محمد الشناوي في التمرين وفي مكان واحد.
وكشف: والدي كلمني وقالي اعمل مداخلة وقولتله لأ لاني حسيت ان دي مش حاجة لذيذة يعني.. ولما روحت البيت قولتله نتصور، وهو دائمًا بيبعتلي كلمة “استمتع” قبل كل ماتش وبعد كل ماتش “مبروك الحمد لله تواضع اكتر ربنا يكرمك أكتر” ولو خسرنا بيقولي “هارد لك” ولو شافني مأثر هييجي يتكلم معايا ودايما سايبلي كل القرارات.
وأردف: أخويا دايما اللي بيتكلم في الموضوع لو فيه فلوس ومحدش يقدر يقول للأهلي لأ ومش هتفرق يعني الماديات.
ووجّه شوبير رسالة إلى جمهور الأهلي: بشكر جمهور الأهلي اللي دايما ورانا وورايا بشكل شخصي وعملوا معايا ملحمة كبيرة.
