مصطفى شوبير: مش شاغل بالي مين هيلعب الفترة الجاية.. والشناوي حقه يزعل
كشف مصطفى شوبير، حقيقة خلافه مع محمد الشناوي، حارس مرمى فريق الكرة الأول بالنادي الأهلي، ومن سيلعب الفترة المقبلة.
تصريحات مصطفى شوبير
وقال شوبير في تصريحات تليفزيونية: مباراة الزمالك في نهائي الكأس هي الأمتع لي؛ لأن أنت بتلعب قدام نادي كبير وجمهور كبير، لكن نهائي إفريقيا في حتة تانية، لكن من ناحية الضغط والصعوبة كان الزمالك هو الأصعب وبعده ماتش الترجي.
وأضاف: مباراة الزمالك كلاسيكو والناس مبتتفرجش على الدوري لكن بيتفرجوا على القمة، ولذلك المباراة ليها طابع خاص وأي شخص يتمنى لعب مباراة أهلي وزمالك.
وعن المباراة الأسوأ له، قال مصطفى شوبير خلال تصريحاته: مباراة البنك الأهلي أصعب لقاء لي مع الفريق الأحمر لأني كنت خارج مستواي تمامًا، ولم نكن موفقين ولم نكن في تركيزنا والمباراة علمتنا كثيرا.
وتابع: بعد إصابة الشناوي كولر قال لي الموضوع مختلف لأن السنة الماضية كنت تلعب في ظرف طارئ، لكن هذا الموسم أنت ستلعبه كاملًا، ومُطالب إن في كل مباراة تظهر في أعلى مستوى ليك، وهذا الطبيعي في النادي الأهلي.
وأكد: ضغط المباريات قصة صعبة للغاية، وهناك أشخاص لا يصدقون الضغط الذي نتعرض له بسبب المباريات.
وأردف مصطفى شوبير خلال تصريحاته: كولر قال لي أنت هتلعب مباراة بلدية المحلة ومباراتي الترجي التونسي في نهائي إفريقيا، وبلغت محمد الشناوي وتقبل القرار، وهو كان حاسم الموضوع من بدري من قبل مباراة بلدية المحلة.
وعن خلافاته مع الشناوي، قال: مكنش فيه موضوع أصلا وطبيعي محمد الشناوي يبقا زعلان لكن في احترام وتقبل القرار، وأنت لو مزعلتش أنك مبتلعبش يبقا فيه حاجة غلط.
وصرّح: واحنا على الدكة بيبقا فيه تواصل بينا، مثلًا بيجي يقولي هدّي اللعب وهكذا وبنشتغل مع بعض عن طريق لغة العين لو حد فينا قاعد على الدكة.
وتابع: مباراة الوداد كانت أول مباراة إفريقية لي وأحلى لحظة في حياتي عندما هتف الملعب كله باسمي لحظة دخول ملعب اللقاء للتسخين وكنت مبسوط وجسمي قشعر.
وأكمل مصطفى شوبير تصريحاته: لقطة تسليم الشناوي للميدالية في مباراة الإياب بالمغرب كانت لقطة جميلة، وكولر كان قايلي قبلها إني برة القائمة خالص وعلي لطفي هيبقا دكة للشناوي.
مصطفى شوبير: مش شاغل بالي مين هيلعب الفترة الجاية
وزاد خلال تصريحاته: حراسة المرمى صعوبتها أنه مركز مش بيقبل القسمة على اتنين وأسهل حاجة هقولك أن فيه مشاكل في المركز دا، وبعد ماتش الترجي مكنتش عارف هعمل اي وجريت لقيت الشناوي جي فـ حضنته، يعني كانت لقطة عفوية مش متفقين عليها.
وعن من سيلعب الفترة المقبلة بعد عودة محمد الشناوي، أكد مصطفى شوبير في تصريحاته: أحسن حاجة أنك تحسم الأمور قبلها بفترة كبيرة، وكولر لسة متكلمش معانا في مين هيلعب الفترة الجاية ومين لأ ومش شاغل بالي بيها أصلا لأني كنت بشغل بالي بحاجات كتير زمان وربنا عوضني بحاجات تانية كبيرة فـ لي هشغل بالي تاني؟.
وأكد: مش بحب أعاند المدرب أو مدرب الحراس؛ لأن أنا الخسران مش حد تاني، بل أجبره أن لما اجي أنا ألعب هو يعترف أنه غلطان، عشان كدة مبحبش أعمل مشاكل.
مصطفى شوبير: فكرت أخرج من الأهلي عشان ألعب
وتطرق مصطفى شوبير في تصريحاته: فكرت أطلع إعارة عشان ألعب وكنت شايف أن محتاج أطلع عشان ألعب لكن مرة كانت لجنة التخطيط ترفض ومرة كان كولر بيرفض.
وأضاف: التصريح اللي هو بكرة أنا هوريكم أن أنا جامد دا مبحبوش لأني مبحبش أتحدى الناس عموما بالكلام لأني لو عايز أوريكم هوريكم في الملعب مش بالكلام.
وتابع مصطفى شوبير خلال تصريحاته: من أكتر الناس اللي مكنتش حابة فكرة الإعارة كان محمود الخطيب لأنه كان شايفني رقم واحد، والخطيب خد مبدأ “NO RISK NO FUN”، ومن أوائل الناس اللي بتكلمني بعد كل ماتش وقبله علي لطفي وشريف إكرامي أكتر من ساندني ودعمني.
واختتم تصريحاته: ميشيل يانكون اتعلمت منه حاجات كتير وفرق معايا في حاجات معينة وأي حد اتمرنت معاه ليه بصمة عليا واتعلمت منهم كلهم.
