أبرز تصريحات هشام ماجد: المنتجين كانوا رافضين مسلسل أشغال شقة.. والسن المناسب للزواج بعد الـ30
تحدث الفنان هشام ماجد عن مسلسله الجديد أشغال شقة الذي عرض في الموسم الرمضاني 2024 وحقق نجاحًا كبيرًا وإمكانية تقديم جزء ثانٍ، إلى جانب حديثه عن مسلسل اللعبة وطفولته وغيرها من الأمور
وتحدث هشام ماجد عن الزمالك وسبب حبه الشديد له، وقال خلال تصريحات إذاعية: كان نفسي أكون لاعب كورة، وأنا زملكاوي، وإحنا بنفرح أكتر من جمهور الأهلي، أنتم بتفرحوا لما تاخدوا بطولة، إحنا بنفرح لما نجيب جول، ودي جملة قالها لي المنتج كريم أبو ذكري، قال لي جمهور الأهلي غلبانين بيفرحوا بكل بطولة وإحنا بنفرح بكل جول، وجول شيكابالا بالنسبة لي بطولة إفريقيا.
هشام ماجد: مفيش جمهور بيحب فرقته زي الزمالك
وأضاف هشام ماجد: مفيش جمهور بيحب فرقته زي الزمالك وعندنا ولاء رهيب، والزمالك بياخد بطولات كتير ونادي كبير بس الأهلي بياخد بطولات كتير أوي.
وتحدث هشام ماجد عن طفولته قائلًا: مكنش فيها شيء من القسوة، ولكن كانت طفولة لطيفة، ووالدي اتوفى وأنا صغير فكانت قسوة من الحياة مش من الأهل وكان عندي 13 سنة.
وأكمل حديثه: أنصح بالزواج في سن الثلاثين وأنت طالع مش قبل، لأن الشخص يكون نضج ويعرف يعني إيه يشيل بيت ويتحمل مسؤولية بني أدمين.
وعن رأيه في الصداقة بين الرجل والمرأة بعد الطلاق، أجاب: شفت حالات نادرة مطلقين وأصدقاء ومنهم صحابي، وبشوفهم صحاب جدا ودي حاجة راقية جدا، وحاجة تفرح ده ويخلي أطفالهم أسوياء لأنهم شايفين علاقة أبوهم وأمهم حلوة حتى لو مش عايشين مع بعض.
وبسؤاله عن هل تفوق مسلسل أشغال شقة على مسلسل اللعبة، أجاب هشام ماجد: كل واحد فيهم تركيية، وصعب أقارنهم ببعض، واللعبة 120 حلقة أربع أجزاء، وأنا حابب النجاح في المسلسلين، ونجاح اللعبة لأنه مع الأطفال والناس مقسمة نفسها فريق وسيم وفريق مازو كأنك بتتفرج على ماتش كورة، وأشغال شقة نجاح لبساطته وقربه من الناس ومفيهوش خيانة وقتل وجريمة وبسيط ولو حكيته قبل ما تتفرجي هتقولي إيه ده.. فيه منتجين كتير قالوا لي مفيهوش حاجة ليه عاوز تعمله؟، لحد ما اتحمس له عبد الله أبو الفتوح وأحمد يوسف وقناة إم بي سي، وصدقونا إننا شايفين حاجة وفكرته بسيطة والتفاصيل نفسها قوية.
هشام ماجد يكشف 3 أمور حمسته لتقديم مسلسل أشغال شقة
وكشف هشام ماجد أن هناك 3 أمور حسمته لتقديم المسلسل، قائلًا: فيه 3 تفاصيل قرأتهم وحمسوني لتقديم المسلسل، وهي أن الدكتور جاب لـ ياسمين أرنب علشان تخس بأنها تاكل من الأكل اللي هو بياكله، والست العجوزة لما راحت معايا الشغل فحطوها مكان المتوفي ودفنوها، وتالت حاجة الشغالة الحلوة ولما حمدي قابل واحد صاحبه افتكر أنها مراته، وأنا بقرأهم قلت عاوزه أعمل ده، والناس بتقدر الموقف الحلو أكتر من الإفيه الحلو، لأن الموقف مضمون وبيشيل.
إمكانية تقديم جزء ثان من مسلسل أشغال شقة
وعن إمكانية تقديم جزء ثانٍ من مسلسل أشغال شقة بعد النجاح الذي حققه الجزء الأول، أجاب: احتمال كبير نقدم جزء ثانٍ ولكن لم يتم اتخاذ القرار الرسمي.
كما تطرق هشام ماجد للحديث عن الجزء الخامس من مسلسل اللعبة، مشيرًا إلى أن الجزء الخامس ما زال في مرحلة الكتابة، ولا يوجد لدينا استعداد أن يكون أقل من الأجزاء السابقة لذلك قررنا نأخذ وقتا كافيا حتى يخرج بأفضل صورة.
