صلاح عبد الله: محمد صلاح عمل لمصر كتير.. ولو عايزينه يلعب هاتوا لعيبة بنفس المستوى
علق الفنان صلاح عبد الله، على الهجوم الذي تعرض له اللاعب محمد صلاح، عقب مباراة مصر وغانا بـ كأس الأمم الإفريقية.
وقال صلاح عبد الله، في تصريحات تلفزيونية: محمد صلاح عمل كتير لمصر ولو عايزينه يلعب زي لعبه مع ليفربول هاتوا ليه اللعيبة اللي بيلعبوا معاه.
وأوضح: صدق نجيب محفوظ لما قال اَفة حارتنا النسيان، مينفعش ننسى كل اللي عمله محمد صلاح لمنتخبنا، صلاح عمل كتير للمنتخب وصورة رائعة لمصر في إنجلترا وأوروبا والعالم كله، الدوري الإنجليزي بيشوفه 4 مليارات شخص على مستوى العالم على الأقل فيهم مليار يعرفوا مصر بالكاد دلوقتي فيه 3 مليار تانيين بيعرفوا مصر بسبب متابعة صلاح.
وأضاف: مش كل الناس في العالم عارفة مصر، ولكن الكتير منهم عرفوا بلدنا من خلال محمد صلاح والكرة، وعلشان كده بقول محمد صلاح عمل لنا كتير.
واستكمل: محمد صلاح عمل كتير للمنتخب لكن إحنا انفعاليين.. في مرة صلاح عمل حاجة وزعلت وعملت إفيه وقلت إني مش هشجع ليفربول تاني، والمقصود بالجملة إني بشجع ليفربول عشان صلاح، محمد صلاح عمل لنا صورة رائعة في أوروبا.
وأشار صلاح عبد الله، إلى أن تعامل البعض مع صلاح على أنه فوق النقد، يضع ضغطًا على اللاعبين الآخرين، مستنكرًا مطالبة البعض لصلاح بتقديم أداء مماثل لأدائه في ليفربول.
وأردف: أعجبتني تدوينة للفنان نبيل الحلفاوي، قال فيها: لو عاوزين صلاح يلعب زي ما بيلعب في ليفربول، هاتوا له نفس مستوى لاعبي ليفربول.. إحنا مش في نفس المستوى ولازم نكون متصالحين مع الفكرة دي.
