فتاة تروي قصة زواجها من شاب قزم: تعرضت للتنمر.. وقالولي هتمشي معاه إزاي في الشارع
استضافت الإعلامية نورين شحاتة في برنامجها البيه والهانم، الذي تقدمه مع الإعلامي ممدوح الشناوي، فتاة بعمر 20 سنة تدعى تقى حسن، وشاب قزم يدعى محمود حامد بعمر 34 سنة، حيث روا قصة زواجهما والتنمر الذي تعرضا له.
وقالت تقى، إنها تعرضت للتنمر عند موافقتها على الارتباط بزوجها، قائلة: كان فيه ناس بتتكلم بطريقة سلبية زيادة عن اللزوم وناس قالوا لي أني وافقت عليه علشان فلوسه، وفيه ناس قالت لي هتمشي إزاي معاه في الشارع، وأنا مش باخد بالشكل عاوزة الشخص بلقبه، ويحبني زي ما أنا على طبيعتي.
وأضافت خلال لقائها وزوجها في البيه والهانم بعد شهر من زواجهما: في البداية كلام الناس أثر فيا، وما كنتش موافقة، ولما كلمت محمود في أول مكالمة قال لي أنا اتعرضت لكلام كتير والناس اتنمروا عليا، وحاولي تبعدي عن كلام الناس وترميه وراء ظهرك، وعائلتي وقفوا جنبي وقالوا لي كلام الناس لا بيودي ولا بيجب.
وعن أكثر ما جذبها له قالت: شاريني وشخص محترم وكويس جدا مش أي زي أي شاب وكنت بدعي ربنا يكرمني بحد زيه والحمد لله استجاب، وهو شاب كويس ومش بيشرب وتحمل المسؤولية لأن والده ووالدته كانوا منفصلين وأخواته صغيرين صرف عليهم وجوزهم وكبرهم.
من ناحيته قال محمود: كنت مسافر ولما رجعت أهلي قالوا لي هنخطب لك تقى ولما شفتها عجبتني وشدتني ليها وقلت لهم ماشي، ولما كلمتا قالت لي موافقة، وأهلها كانوا مرحبين بيا.
وعن سبب ظهورهم على التيك توك، قالت تقى: حبيت أوصل رسالة للناس أنه مش بالشكل، البني آدم بقلبه وأخلاقه.
بدورها علقت نورين شحاتة: أصلا البني آدم لما يحب بني آدم ويرتبط به، بيحبه لنفسه ولشخصيه ولو سألتي بني آدم عن سبب حبه، وقال لك أسباب يبقى هو مش بيحبه بحد، لأن الحب بجد بيكون من غير أسباب.
نورين شحاتة: يا ريت نسيب كل واحد ياخد اختياراته بنفسه
واختتمت: يا ريت نسيب الناس في حالها ونسيب كل واحد ياخد اختياراته بنفسه ويعيش تجاربه بنفسه نجح مبروك له، فشل هيتعلم من التجربة دي، وهتخلي شخصيته قدام أفضل، بس يا ريت نسيب الناس في حالها طالما مش بيعملوا حاجة تأذي غيرهم.
