عمرو سلامة: أفلام عادل إمام ووحيد حامد لا يُسمح بها اليوم
تحدث المخرج عمرو سلامة عن الرقابة على المصنفات الفنية، واصفًا هذا القانون بأنه مطاطي بشكل كبير، كما أشار إلى أن أفلام الكاتب الراحل وحيد حامد، لا يصلح عرض أعمال مثلها في الوقت الحالي.
وقال عمرو سلامة خلال تصريحات تليفزيونية: أنا بالصدفة كنت بتفرج على خمس أفلام ورا بعض بحبهم جدًا، وهما الخماسية بتاعة عادل إمام والمؤلف وحيد حامد والمخرج شريف عرفة، مفيش ربع ساعة في أي فيلم فيهم يُسمح بيها النهارده، الأفلام دي مكنتش عن العُري، ولكن كانت بتناقش مشاكل حقيقية في المجتمع وبتمثل شخصيات واقعية.
عمرو سلامة: المجتمع قادر على فرض إرادته على المبدع
وأضافعمرو سلامة، واصفًا قانون الرقابة الفنية بأنه مطاطي، حيث قال: قانون الرقابة عندنا في مصر مطاطي جدا، والقانون ده بيخلي الموافقة أو المنع مبنية على عوامل كتير جدا، ومن ضمن العوامل دي الذوق الشخصي للرقيب وتحليله للفيلم، فالموضوع محتاج إرادة سياسية واضحة جدا، والمجتمع دائما هو القادر على فرض إرادته على المبدع وحماية نفسه، لأني لو عملت حاجة ضد المجتمع، هيتجنبني ومش هيتفرج على أعمالي.
عمرو سلامة: هناك فجوة بين المبدعين والشعب المحافظ
واختتم عمرو سلامة حديثه، مؤكدًا على إنه هناك فجوة بين المبدعين والشعب المحافظ، الذي يرفض فكرة التحرر، وقال: في طول الوقت فجوة بين المبدعين والشعب اللي معظمه محافظ، ولما بيشوفنا بنتكلم عن حرية الإبداع، كل اللي بييجي في دماغه إن دي ناس منحلة عايزة تعمل عُري وعايزة تعمل أفكار تبوظ أخلاقنا، بس لأ الهدف إن إحنا يبقى عندنا حرية إن إحنا نتكلم عن مشاكلنا الحقيقية وإننا نمثل الناس الحقيقية في العالم.
