هشام ماجد: أحمد فهمي كان عايز يعمل دوري في فيلم بنات العم.. ومش هستخدم شتايم في أعمالي

تحدث الفنان هشام ماجد، عن برنامج الفرنجة الذي قدمه هو والفنانين أحمد فهمي وشيكو في عام 2015، كما كشف أنه وأحمد فهمي كانا يرغبان في نفس الدور من فيلم بنات العم، بالإضافة إلى رأيه في استخدام الشتائم بأعماله الفنية.

وقال هشام ماجد خلال تصريحات تليفيزيونية: الفرنجة أمتع تجربة صورتها في حياتي، وميزة الفرنجة إن إحنا كنا بنعمله بالروح القديمة بتاعتنا، اللي هي أول ما بدأنا نمثل، اللي هو لو معرفناش نجيب تصاريح للتصوير في الشارع، هنصور ونوّقف واحد على أول الشارع، عشان لو البوليس جه يعرفنا ونجري.

وتابع: فكان في مغامرات كتير في تصويره، ومثلا كنا عايزين في إيطاليا نستحمى في النافورة، وده طبعا مش مسموح بيه هناك، فهل هنبوظ البرنامج؟ لأ هننزل ولو البوليس جه هنجري، ففي الآخر بعتبره فكرة هادفة جدا، بيوريك إننا لما بنسافر برا غصب عننا بنحترم القوانين اللي مش بنحترمها هنا.

هشام ماجد: سمير غانم قال علينا مستقبل الكوميديا في مصر

وتطرق هشام ماجد، للإعراب عن حبه الشديد للفنان الراحل سمير غانم، وقال: أستاذ سمير غانم الله يرحمه بالنسبة لنا حاجة كبيرة أوي، نادر لما يكون له حاجة أنا مش حافظها، وكان لينا الشرف إنه وافق يطلع معانا ضيف شرف في أول أعمالنا، وقف جنبنا جدا ومن بداياتنا كان بيتكلم علينا، وبيقول علينا دول مستقبل الكوميديا في مصر، وليا الشرف إن آخر حاجة هو صورها في السينما، كان مشهد في فيلم تسليم أهالي وأنا كنت معاه فيه.

هشام ماجد: أحمد فهمي كان عايز يعمل دوري في فيلم بنات العم

كشف هشام ماجد، سر خلف كواليس فيلم بنات العم، مشيرًا إلى أن أحمد فهمي كان يرغب في تقديم دور شاهندة، الذي جسده هشام في فيلم بنات العم، قائلًا: فهمي مكنش عايز يعمل دوره في فيلم بنات العم، وكان عايز يعمل دور شاهندة اللي أنا عملته في الآخر، وأنا برضه كنت عايز أعمله، ففضلنا قافشين كتير بس في الآخر هو اقتنع وجه على نفسه وعمل دور شوق، بس كان من أحلى أدوار أحمد فهمي.

واختتم هشام ماجد حديثه، كاشفًا رأيه في فكرة استخدام الشتائم في أعماله الفنية، وقال: لو مفيش رقابة برضه مش هحب أطلع شتايم في أعمالي، أصل في الآخر في أطفال وأُسر بتتفرج عليا، برغم إن لو في شتايم في الأعمال هتضحك أكتر، بس أنت كدة هتخسر جمهورك، وأنا مع وجود تصنيف الرقابة للأفلام للكبار فقط وهكذا.