المتهمة بقتل طبيب الساحل في التحقيقات: أحمد شحتة اتجوز من ورايا وكنت بصرف عليه | خاص

حصل القاهرة 24 على نص التحقيقات في قضية طبيب الساحل، بعد مقتله على يد 3 أشخاص، وهم طبيب ومحامية ومساعد الطبيب، وحوت الأوراق اعترافات المحامية إيمان إحدى المتهمين، والتي استدرجت طبيب الساحل للعيادة بحجة مرض والدها حتى تمكن المتهمون الآخرون من قتله.

أقوال المتهمة بقتل طبيب الساحل أمام جهات التحقيق 

ويستكمل القاهرة 24 نشر اعترافات المتهمة إيمان في قضية طبيب الساحل، وقالت أمام جهات التحقيق: عرفت بالصدفة من منشور على صفحة قرية الخيس اللي أحمد شحتة منها أنه كتب كتابه بعد أيام قليلة، لأنهم كانوا منزلين تهنئة مباركة لزواجه وساعتها أنا كلمته وواجهته، وفضل يقولى هي اللي غصبت عليا العروسة وأبويا هو اللى تكفل بكل مصاريف الجوازة، وقالي متخافيش احنا هنفضل مع بعض، ولما ربنا يفتحها عليا هتجوزك رسمي، وساعتها أنا فضلت ما اتكلمش معاه لمدة 3 شهور.

وأضافت المتهمة بقتل طبيب الساحل في التحقيقيات: لكن في الآخر مقدرتش اتحمل زنه، ورجعت أكلمه ورجع يحصل علاقة جنسية كاملة بيننا، وبقيت أروح معاه شقة في دهشور عشان الغرض ده، واستمريت معاه فترة لغاية سنة 2020، قالي إنه معاه عيادة في البساتين وبقيت أروح معاه هناك، وفي سنة 2021 أجر العيادة اللي في الخلفاوي، وبقيت أروحله هناك عشان أمارس العلاقة الزوجية.

وتابعت المحامية إيمان: بعدها قالي إنه عاوز يشتغل في التجارة، وفتح مطعم في الزقازيق، وبعدها بشهر قالي المحل خسر والشركاء السوريين سحبوا فلوسهم وبقيت مديون وسحبت قرض ب 80 ألف جنيه، وبقى عليا ديون كتيرة ومش عارف يعمل ايه، واستلف مني 15 ألف جنيه، عشان يعرف يقوم تاني، واديتهمله من الفلوس اللي محوشاها عشان جهازي، لكن مفيش شهرين ولقيته بيقولي أن الدنيا زنقت معاه أكتر، وعاوز ياخد قرض تاني، وبقيت اديله 500 جنيه كل أسبوعين، وبعدها قولتله أنا عاوزة فلوسي الـ 15 ألف عشان أسدد الجمعية، لكن مرضيش يديني فلوسي، وقالي ملكيش عندي غير الـ 500 جنيه عشان تسددي الجمعية.