الكاتب عمر طاهر: مش بكتب علشان التريند ولا الذوق العام.. الفكرة صاحبة القرار وأنا شغال عندها
بدأت منذ قليل، ندوة الكاتب والسيناريست عمر طاهر، في مكتبة مصر العامة، التي تحمل عنوان عالم عمر طاهر، لمناقشة وتوقيع أعماله، والحديث عن مسيرته الإبداعية.
وقال عمر طاهر خلال ندوته بمكتبة مصر العامة: أساس شغلي إن أي فكرة اكتسبتها بكون عايز أقدمها.. الأساس يكون عند الشخص حاجة يقولها سواء كان قصة أو سيناريو.. لكن الأساس عندي الفكرة اللي هي دايمًا بتختار الفستان اللي هتلبسه، الفكرة هي صاحبة القرار وأنا بشتغل عندها.
وأكد عمر طاهر إنه لا يستهدف فئة معينة من القراء في كتاباته، قائلًا: أنا بقدم العمل وبتمنى يوصل للناس.. أنا مش بكتب علشان التريند ولا الذوق العام لكن بكتب اللي بستمتع بيه فقط.
وتابع عمر طاهر: أنا بكتب علشان دي الحاجة اللي بحب أعملها وبعرف أعملها وبلاقي نفسي فيها، ومن حسن حظي أن الهواية اللي بستمتع بيها تكون هي أكل عيشي.
الكاتب عمر طاهر: بيتنا الوحيد اللي كان فيه مكتبة.. وأشك أن يكون ليا تأثير
كما تطرق عمر طاهر، خلال حديثه عن نشأته، قائلًا: نشأتي مفيهاش حاجة تتحكي أو ممكن تكون مختلفة، ولكن دايمًا كنت محظوظ لأني نشأت في بيت فيه مكتبة وكان بيتنا الوحيد اللي فيه مكتبة، وبلبس نظارة من خمسة ابتدائي كان في ضخ لحب القراءة والتعود على الكتاب والمجلة، وبعتبر نفسي دي من الحاجات اللي فرقت معايا.. وكان عندي جد قارئ نوعي وعنده مكتبة مميزة وبيتابع مجلات.
أما عن الأدباء والكتاب الذي تأثر بيهم في كتاباته، موضحًا: اللي أتأثرت بيهم 90 % مش كتاب، بتعلم من أي حد بيكتب لكن التأثير فعلًا في ناس ليها طريقة في التعبير عن اللي جوها، أنا بحب اتعلم منهم زي بليغ حمدي، بحب بليغ حمدي وبسمعه وتابع اللي بيتكب عنه وبتعلم منه طريقة تعاملوا مع الفن وأيضا صلاح جاهين، وشيكابالا في الكرة.
وأكد عمر طاهر أنه لم يكن يتوقع أن كتابته يكون لها تأثير إيجابي لدي بعض جمهوره، قائلًا: أنا شاكك في موضوع أن يكون ليا تأثير ولكن عندي محبين وصحاب على الورق.. ولكن بحاول محطش التاثير كمقياس لأن الفكرة هتكون مرهقة.. كان هدفي أقدم شغلي بشكل استمتع بيه وأقول اللي عندي واعبر عن شخص في مكان ما، دي الحاجات اللي بتحركني.
