غادة إبراهيم عن ملابسها الجريئة بعد أداء العمرة: بين العمرتين يمحي الله الذنوب.. ولا أقرب الكبائر
تحدثت الفنانة غادة إبراهيم، عن ملابسها الجريئة، مشيرة إلى أنها تفعل خيرًا كثيرًا حتى يمحو الله سيئاتها، مؤكدة في الوقت نفسه أنها لا تقرب الكبائر.
وقالت غادة إبراهيم في لقاء تلفزيوني: أنا لسه راجعة من العمرة من شهر ومن العمرة للعمرة يمحو الله ما بينها من ذنوب، وفي فرق بين الموبقات والكبائر وأنا لا أقرب الكبائر، وبحب ألبس لبس فاشون وبعمل خير كتير يمحي لي السيئات وبقرأ كتير في الدين وبصلي متواصل ومش بسيب فرض بقى لي أكتر من عشرين سنة، وفي الآخر الحاجات دي تعتبر من الموبقات مش الكبائر لأني مش بعمل سحر ولا قذف المحصنات ولا أكل مال اليتيم والربا وربنا يسامحني.
وأضافت غادة إبراهيم متحدثة عن ملابسها: لكل مقام مقال ولما أدخل مكان مجمع بلبس محتشم، ومقدرش أقول الحجاب مش فرض، وربنا يهديني ويسامحني وممكن الفترة الجاية أقرب أكتر من ربنا.
غادة إبراهيم تتحدث عن مشهدها الجريء في الإمبراطورة
وعن مشهدها الجريء في فيلم الإمبراطورة مع الفنانة نادية الجندي قالت: لو أقدر أشيل مشهدي كنت هشيله وهو المشهد الوحيد اللي عملته في تاريخي، والمشهد ده ما كانش مكتوب كده على الورق، وبعدها عملت 15 فيلم مفيهمش ولا حاجة، وهما في الأول كانوا عاوزين يحطوني في أدوار الإغراء وشبهوني بناهد شريف وكانوا عاوزيني آخد مسيرتها وأكون خليفة ليها ولكن رفضت أقدم إغراء تاني.
وأشارت غادة إبراهيم إلى انها انفصلت بعد مشهدها في الفيلم قائلة: كان فيه خلافات بيني وبين جوزي ومتفقين على الانفصال والمشهد ده عجل بالانفصال، وبعد ما شافه قال لي مش كنت عاوزة تنفصلي هطلقك، وكنت مخبية الفيلم لكن أولاد الحلال قالوا ليه تعالى شوف.
