هند عاكف: عملت عملية تجميل رباني بعد الحادثة.. وأتمنى ألا يقسو الجمهور علينا
أكدت الفنانة هند عاكف أنها لم تخضع لأي عمليات تجميل بعد الحادث الذي تعرضت له لاستعادة جمالها، بجانب حديثها عن عودة الفنانة شيرين عبد الوهاب مرة أخرى للساحة الغنائية، معربة عن أمنيتها في أن لا يقسو الجمهور على أي فنان.
وقالت هند عاكف خلال لقائها مع القاهرة 24: ربنا نجاني من الحادث وكان صعب، الحمد لله مفشي إصابات ولكن عندي كدمات في راسي لسة موجودة وعينيا فيها دموع كتير لسة هكشف تاني، ووشي كان مورم بس خف بالأدوية.
وتابعت: والله ربنا اللي حماني والتجميل اللي حصل من عند ربنا مش مني أنا، وربنا حماني وخلاني على قيد الحياة، وبشكر كل زملائي والإعلاميين اللي سألوا عليا والصحفيين أصدقائي اللي طمنوا الناس عليا.
وأضافت: وبشكر زملائي الفنانين واللي كلموني منهم الدكتور أشرف زكي والفنانة نهال عنبر، ومنال سلامة، عبير منير، أمل رزق، وفاء مكي، ناس كتير مش عايزة أنسى حد، والحمد لله أنا سعيد بحب جمهوري وزملائي ليا.
هند عاكف للجمهور: الفنان ممكن يجيله أزمة نفسية بسبب تعليق
وعلقت الفنانة هند عاكف على عودة الفنانة شيرين عبد الوهاب من جديد، وسخرية الجمهور من سقوط شيرين على المسرح في حفلها بـ دبي، قائلة: هي طبعًا مقصدتش توقع نفسها على المسرح هي وقعت غصب عنها وأي فنان معرض للموقف ده، وأكتر من فنانة وقعت في مهرجان القاهرة السينمائي بسبب الفساتين.
ووجهت هند عاكف رسالة للجمهور قائلة: أنا عايزة أقول للجمهور والسوشيال ميديا إنتوا حبايبنا وأصحابنا وجمهورنا الغالي مش عايزينكم تبقوا قاسيين علينا ولا على أي فنان يحصله موقف، إنتوا متعرفوش ظروف الفنان ده إيه، لو الفنان ده قرأ تعليق ممكن يحصله أزمة نفسية.
كما حرصت على نعي زميلها الفنان مصطفى درويش، قائلة: أنا زعلت جدًا وأول حاجة كتبتها على صفحتي عزاء ليه، إحنا زملاء وبيت واحد وحزنت عليه جدًا وكان نفسي أحضر الجنازة والعزاء ولكن لظروفي الصحية قدمت له واجب العزاء من خلال النعي اللي كتبته على فيس بوك.
