والدة مصري مختطف في ليبيا: طلبوا فدية 45 ألف جنيه وابني مرجعش.. وأطالب المسئولين بالتدخل | خاص
كشفت بهيّة محمود المرسي خليل، والدة شاب يدعى كامل محمد كامل عفان مختطف في ليبيا منذ شهر أكتوبر الماضي، تفاصيل وكواليس خطف ابنها، ومتابعتهم للحالة على مدار الشهور السابقة.
وقالت والدة المصري المختطف بـ ليبيا، في تصريحات خاصة لـ القاهرة 24، إن ابنها سافر إلى ليبيا جوا يوم 28- 8-2022، وبعد شهرين من الإقامة هناك تم اختطافه من قبل عصابة مجهولة، موضحة: بعد الشهرين قعد أسبوع ميكلمنيش واتصل عليا وقال أنا مخطوف يا ماما، عاوزين 45 ألف جنيه، وإحنا مش معانا وكل ما يكلمني أقوله مفيش.
مصري مختطف في ليبيا
وتابعت: كان كل شوية يكلمني من أرقام مختلفة، ويقولي بيموتوني يا ماما وبيضربوني، والحمدلله قدرنا نتصرف بعد شهرين وأخدت قرض، وعشان عندنا واحد من أهل المنوفية هناك عايش بقاله 15 سنة في ليبيا اتصلنا عليه وقلناله ياخد الفلوس ويديهالهم بعد ما يتسلم ابنها.
واستكملت: قال بيني وبينه ساعة وأنا هتواصل وهتفاوض معاهم، ومش هسلم الفلوس إلا أما استلمه، وهجيبه وأشغله معايا، حولناله الفلوس وبعد ما حولناهم قال اتنصب عليا وحولتلهم الفلوس ومعرفش حاجة عن كامل، وكده الفلوس راحت علينا.
وقالت: ابني بقاله 5 شهور مخطوف مسمعتش صوته بقالي أكتر من 10 أيام، مش عارفين نتصرف في فلوس تاني ومش عارفين نرجعه، خبطنا على أبواب كتير من المسئولين بس المحاولات كلها فاشلة، مُناشدة المسئولين بالتدخل.
