أيمن بهجت قمر عن خلافه مع الجسمي: أقدر أعيد الأغاني مع أصوات تانية.. والقانون بيقول ده حقي أديهولك ليه؟
تحدث الشاعر أيمن بهجت قمر عن تفاصيل خلافه مع الفنان حسين الجسمي، حول حقوق الملكية الفكرية، مشيرًا إلى أن علاقته بالجسمي طيبة على مدار السنوات الماضية.
وقال أيمن بهجت قمر خلال ندوته في القاهرة 24، هناك عدد من الأغاني صنعته للجسمي ناجحة ولم أعطيه حقوق طرحها على حساباته الرسمية على الديجيتال حتى الآن، ولكن أحترم الكلمة التي أعطيتها له والتي بمثابة عقد.
وأضاف أيمن بهجت قمر: فجأة هو عامل تنازل وفيها صيغة مبيعملهاش حد ولا فيه داعي لحد يعملها، واتكلمت معاه وقالي هنعمل استثناء وجينا في تتر مسلسل وسط البلد وطلب بردو بعض الحاجات في العقد فأنا رفضت وحصل بينا الزعل ده، وهو دلوقتي كتب كلمة كويسة والموضوع ده تمام، أنا موجود ومادد إيدي للكل ومببصش لحقوق حد لو القانون مديك حق يبقى بتاعك لكن القانون بيقول إن ده حقي أنا اديهولك ليه؟ عايزه يبقاله مقابل مش انا اللي اخترعت القانون، وفيه حاجات ملهاش مقابل النهارده انا بسيب حاجات لعيالي، لما بيجوا يعملوا إعلان قديم بتاعي بياخدوا حقوقه مني، ده رزقي بتاعي.
وأضاف: لو هيتم استغلالها بشيء له علاقة بمنتج أو حقوق الأداء العلني القانون بيديهاني لازم يبقالي حقوق فيها، إنما اتنازل تمامًا عن كل شيء؟ وارجع أقول تراثنا راح أو اتباع؟ خلي بالك اللي أنا عملته الفترة اللي فاتت كل أغانيه أقدر أعيدها مع أصوات تانية بمنتجين تانيين انا مبعملش كده؛ لأن الاغاني موجودة بأصولها لكن لو جينا في لجظة ملقيتش الأصول دي هعيدها بأصوات مصرية تاني وده حقي.
وأردف أيمن بهجت قمر: بالبنط العريض هو بعت قالي هاتلي كام ألف جنيه وأنا مفتحتش بوئي معاه بالعكس وفيه تفاصيل تانية مش هتطرق إليها لكن ربنا يهدي الأحوال.
واختتم أيمن بهجت قمر حديثه: دخلنا في مشاكل ليها علاقة بحماية الحقوق وخسرنا ناس واتصالحنا مع ناس وقاطعنا مع أصوات كبيرة ووصلنا إن بقى فيه طريقة معينة للتنازلات ومعنديش مشكلة مع روتانا ولا عمرو دياب ولا الجسمي وطول عمري علاقتي بيه طيبة.
