شقيق عبد الحليم لـ عمر كمال: صعب تكون زي العندليب لأن الأساطير بتكون كل 100 سنة
علق محمد شبانة، شقيق الفنان الراحل عبد الحليم حافظ، على التصريحات الأخيرة للفنان عمر كمال، بشأن تمنيه في بداية حياته بأن يكون مثل العندليب.
وقال محمد شبانة، في تصريحات خاصة لـ القاهرة 24: من المحتمل أن يكون عمر كمال صرح بأنه سيكون شبيه عبد الحليم من حبه له، وإنه بيزوره في قبره دي حاجة بحييه عليها.
محمد شبانة: عبد الحليم حافظ موهبة لن تكرر
وتابع محمد شبانة: ممكن يتمنى إنه يكون زي عبد الحليم في حبه الناس له، أو يأخده قدوته، لكن يبقى شبهه يسببها لربنا، لأن ربنا بيخلق الأساطير دول واحد كل 100 عام.
واستكمل محمد شبانة: عبد الحليم حافظ مفيش زيه، ربنا حط فيه إحساس مش موجود خالص.. وصوت وموهبة مش هتتكرر، وعبد الحليم حافظ قدم كمية كبيرة جدًا من الأغاني وفضل مأثر في وجدان الجمهور وكان نجم منفرد.
كما تطرق محمد شبانة، للحديث عن موهبة عمر كمال، قائلًا: أنا معجب بصوته.. جميل جدًا وبيغني كويس وسليم وحساس ودمه خفيف.
تصريحات عمر كمال عن عبد الحليم حافظ
وكان عمر كمال تحدث خلال لقائه مع الإعلامي رامي رضوان، مقدم برنامج dmc، عن حبه لعبد الحليم حافظ، قائلًا: من صغري بحب الفنان عبد الحليم حافظ وشايفه قدوتي وهبقى زيه.
وتابع عمرو كمال: كنت بنزل أزور عبد الحليم حافظ في المقابر بتاعته في البساتين، أمي كانت تقولي إنت مجنون؟ يا ابني روح زور أبوك، إنت عامل زي القرع تمد لـ برا، إنت مالك بعبد الحيلم ومالك بالناس دي كلها، بس أنا بحب عبد الحليم لأن كان في مُخيلتي إني هبقى فنان زيه.
آهر أعمال عمر كمال
ويذكر أن عمر كمال طرح مؤخرًا أغنية خلينا سهرانين، عبر حسابه الشخصي بموقع الفيديوهات الشهير يوتيوب، وحققت نجاحًا كبيرًا، وهي من كلمات وألحان عمرو قطب، ومن توزيع وسام عبد المنعم.
وجاءت كلمات أغنية خلينا سهرانين، كما يلي: بقى ده اسمه كلام، بقى حد يسيب القعدة الحلوة دي ويقول سلام، بقى ده اسمه كلام، ده إحنا ما صدقنا نشوف بعض تقوم نمشي قوام، ده السهرة دي يا دوب لسه بتبدأ والجو يا روحي عليه، يخلي اللي ما نمش يلقاه أسبوع يسهر ما ينام، تمشي تروح فين خلينا سهرانين.
