جيلان علاء: أنا عندي شخصيات متنوعة.. وملابسي بتحدد شخصيتي
كشفت الفنانة الشابة جيلان علاء سر مواهبها المتعددة في عالم التمثيل، كما أكدت أن الملابس هي التي تحدد شخصيتها في العمل.
وقالت الفنانة الشابة جيلان علاء في تصريحات خلال لقائها مع الإعلامية إنجي القاضي ببرنامج مساء Dmc، إنها ارتدت فستان الفرح قبل ذلك 3 مرات في أعمالها الفنية، مضيفة: الفستان قبل فرحي مختلف تماما وحسيت بالبهجة، وأول مرة جربت فستان الفرح اتخضيت وعيطت، وكنت بقول إن الجواز بالنسبة لي مش فارق، لكن الجواز قرار من عند ربنا وبيبعت لنا الشخص المناسب اللى نتخيل حياتنا معاه عشان نقدر نكمل مع بعض.
كان حلمها التمثيل وبدأت مذيعة راديو
وأوضحت جيلان علاء، أنها تخرجت في كلية الإعلام قسم الإذاعة والتليفزيون، وكان حلمها التمثيل، ولكنها بدأت كمذيعة راديو، إذ قالت: بدأت أعمل فيديوهات وبدأت تنتشر على السوشيال ميديا واتعرفت على أكرم حسني وطلب إنى أشارك معاه في أسعد الله مساءكم، وقدرت أخرج الشخصيات اللى جوايا، لأني بتغير على حسب الموقف واللبس.
شخصيتها الفنية ودور ملابسها
وأضافت الفنانة الشابة جيلان علاء: اللبس ليه دور كبير جدا في شخصيتي وبقدر أتحول بسرعة، وحتى الآن لسه ماتقدمتش ليا الأدوار اللى تخليني أطلع الشخصيات اللى جوايا، وكتير من المخرجين عارفين ده بس مفيش حد حاول يستغل ده ويخرج كل الشخصيات اللى جوايا، وقررت إنى أخرج باقى الشخصيات على السوشيال ميديا وأبقى انا المخرجة والسيناريست والمنتج واقول اللى أنا عاوزاه.
وأكدت الفنانة الشابة جيلان علاء، أن الفنان لديه قدرات وخبرات متنوعة ولكنه بحاجة دائمة لمخرج يساعده على إخراج مهاراته أمام الكاميرا.
