مشربتش مياه من 17 سنة والفنانات بيدخنوا في الخفاء لأن المجتمع مُنغلق.. أبرز تصريحات سماح أنور التلفزيونية

حلت الفنانة سماح أنور، ضيفة على إحدى البرامج التلفزيونية، وتحدثت خلال حوارها عن تفاصيل تعاونها مع المخرج هاني خليفة في مسلسل الليلة واللي فيها، ومشوارها الفني، بالإضافة إلى تفاصيل نظامها الغذائي.

ويعرض لكم القاهرة 24 أبرز تصريحات سماح أنور التلفزيونية:-

• مجتمعاتنا بتتميز بشكل الحماة اللي بتتدخل في كل شيء، لإن الحب والاهتمام عندنا بيُترجم بإن دا تدخل، وده خطأ شائع، والحموات إحنا سميناهم حموات عشان كل أم بتحامي لأولادها.
• كان فيه بعض المشاهد في مسلسل اللية واللي فيها بنعيدها 20 مرة، عشان الأداء ونوصل للنتيجة اللي عايزينها، وكان فيه مشهد عدناه 6 مرات عشان تعبيرات وشي وأنا نايمة في المشهد كانت مشدودة.
• أنا قُلت للمخرج هاني خليفة شكرًا إنك اتولدت لإني بدور عليك من زمان أنا مكنتش عارفة إنك موجود، وأنا من معجبينه أصلًا، كان عبقري في مسلسل الليلة واللي فيها.
• معلقتش على شائعات ابني، لأن أنا بحس إن الكلام في حياتي الشخصية عيب ودي قلة قيمة، لإن أنا سمعت الكلام ده في البيت، وبحس إنه علم لا ينفع وجهل لا يضر، هل هتنفعك المعلومة دي في حياتك أو هتنفعك في حاجة؟ أنا مش عايزة أرد علشان دي حاجة تخصني، وعيب أوي إن حد يسأل حد عن حاجة شخصية.
• أنا مستمتعة لوحدي وأنا في سن مش بتاع حب، وبعدين لسه هقوم أحط ميكب وألبس وأنزل ونسهر ونرجع طب وشغلي وبكون عايزة أنام؟ وأنا من الناس الكسولة واتعودت على البيت ومش بحب أخرج إلا إذا كان عندي شغل.
• اتعودت أبقى لوحدي وبقى دا نظام حياتي ودي جنتي والحياة المثالية ليا.
• عمري ما قولت عايزة أتجوز وبدور على حد، وممكن تحصل بدون ترتيب، وحبيت مرة واحدة في حياتي ومكنتش لطيفة والست لما بتحب بتقع على وشها ودا بيطفش الرجالة.
• الفنانات بيدخنوا في الخفاء لأن المجتمع منغلق انغلاقا كُليا، والناس اللي بتنتقد أخلاقيات غيرها هما أكتر الناس اللي لا يلتزموا بأي أخلاق، وهي دي مشكلتنا إننا كدابين بدرجة لا نتصورها عشان كده الشخصيات العامة بتخاف تكسر صورتها قدام العالم.
• الناس بتسألني هو إنتي ليه مسترجلة؟ هو ده اللبس إن الناس لما بتتفرج على عمل بتفتكر إن الممثل عامل كده في الحقيقة، أنا مفيش دورعملته بيمثلني لغاية دلوقتي خالص ومش هعمل كده، مينفعش إني اختار أكون ممثلة وأزعل من آراء الناس، أنا هتضايق لو الموضوع شخصي، ولكن دي مهنتي وده مش أنا.
• بقالي 17 سنة مشربتش مايه، لازم المايه ميبقلهاش طعم ولا ريحة، دي مواصفاتها، المايه كلها ليها طعم وليها ريحة دي مبشربهاش، لما باخد منها جسمي بيضايق وبطني بتوجعني.
• مش لازم بس نشرب المايه، أحنا بناكل فاكهة وبناخد منها المايه ودي السكريات اللي بيحتاجها الجسم طول الوقت، ولو وقفت في الهواء الجلد بيشرب الرطوبة اللي في الهواء.

سماح أنور: بفرح أوي لما بيقولوا إنتي مسترجلة.. وعمري ما عملت دور وكان بيمثلني

سماح أنور: سني لا يسمح بالحب.. وحبيت مرة واحدة وكانت تجربة مش لطيفة