سماح أنور: بفرح أوي لما بيقولوا إنتي مسترجلة.. وعمري ما عملت دور وكان بيمثلني
قالت الفنانة سماح أنور، إنها لم تقدم أي شخصية تمثلها بشكل شخصي طوال مسيرتها الفنية، مؤكدة أنها لا تنزعج من نقد أفلامها أو من سؤال الجمهور عن تشبهها بالرجال في أعمالها.
وأوضحت سماح أنور، في تصريحات تلفزيونية قائلة: الناس بتسألني هو إنتي ليه مسترجلة؟ هو ده اللبس.. الناس لما بتتفرج على عمل بتفتكر إن الممثل عامل كده في الحقيقة، أنا مفيش دور عملته بيمثلني لغاية دلوقتي خالص ومش هعمل كده، أنا بحب الاختلاف مع إني كسولة ولكن عندي أحلام وأفكار محدش بيفكر فيها كتير، بحب أشتغل على نفسي وبحب أخدم سماح أكتر، لأني مؤمنة إن محدش هيعرف يخدمك قد نفسك ولا هيعرف إمكانياتك قدك، مساندة الواحد لنفسه أهم من مساندة الناس.
وأضافت: أنا اخترت أكون ممثلة، مينفعش يكون ده اختياري وأزعل من آراء الناس، أنا هتضايق لو الموضوع شخصي، ولكن دي مهنتي وده مش أنا، واللي بينقد دور أنا بستفيد منه كممثلة، واللي بيقول دي سماح مسترجلة بفرح أوي لأنه صدق الدور.
واستكملت سماح أنور حديثها قائلة: هو مسترجلة يعني إيه بحلق دقني الصبح؟ تفسير الكلمة نفسها أنا مش فهماه، أنا ست رياضية وبحب السينما المختلفة.
أما عن رفضها التعليق على الشائعات المتعلقة بنجلها، فقالت: أنا بحس إن الكلام في حياتي الشخصية عيب ودي قلة قيمة، لأن أنا سمعت الكلام ده في البيت، وبحس إنه علم لا ينفع وجهل لا يضر، هل هتنفعك المعلومة دي في حياتك أو هتنفعك في حاجة؟ أنا مش عايزة أرد علشان دي حاجة تخصني، وعيب أوي إن حد يسأل حد عن حاجة شخصية.
