شهيرة عن عودتها للتمثيل: خايفة ومترددة.. ممكن لو جاتلي حاجة واو أتحمل وأنزل
تحدثت الفنانة شهيرة، عن إمكانية عودتها من جديد للساحة الفنية بعد غياب دام لسنوات طويلة، مؤكدة أنها ما زالت تتلقى العروض، ولكنها مترددة في العودة على حد قولها.
وقالت شهيرة، في لقاء تلفزيوني: في عروض وأنا ببقى متحمسة جدًا وقتها، ولكن لما بفكر وأقول طب والورق، أهم حاجة الورق لأني بقالي فترة طويلة أوي مطلتش على الناس بأي دراما، فبعد السنين دي كلها الواحد بيبقى قلقان بردو، ومش عارف بعد السنين الطويلة دي هيقدم إيه للجمهور، هل هقدم حاجة يقولولي لأ يا ريتك ما عملتيها ما إنتي كنتي قاعدة وإحنا حابينك كده، أنا مترددة.
وتابعت شهيرة، أن ما يقلقها من العودة هو عدد ساعات التصوير قائلة: أنا عرفت إن المناخ والمهنة بقت صعبة وبيشتغلوا بالـ 18 ساعة، وعلى أيامنا كان 8 ساعات حاجة كده بشياكة وحلوين أوي وبنبقى واعيين باللي بنعمله، مش بنعمل نص دورنا وإحنا تعبانين، الحاجات دي قلقاني لأني مش واخدة على كده.
وأضافت أن نجلها السيناريست عمرو محمود ياسين، دائمًا ما يحذرها من العودة خوفًا على صحتها، قائلة: دايمًا عمرو ابني بيقولي والله يا مامي ما هتقدري، ده شيء مرهق جدًا، الدلع اللي كنتي بتدلعيه زمان مش هتلاقيه دلوقتي، ممكن لو جاتلي حاجة واو أتحمل وأنزل.
آخر أعمال شهيرة
كان آخر أعمال الفنانة شهيرة، هو فيلم الحب بين قوسين، من تأليف نبيل عصمت، ومن إخراج أشرف فهمي، وضم عددا كبير من الفنانين، أبرزهم سلوى عثمان، وداد حمدي، محمد الصاوي، نادية رفيق.
