مع السلامة يا قطعة من الروح والقلب.. والدة علي فايز متسابق برنامج الدوم تنعيه بكلمات مبكية
كنت نفسك تموت قبلي عشان تفتحلي باب الجنة وحلمك اتحقق.. بهذه الكلمات المؤثرة، نعت ماجي طليعة والدة علي فايز متسابق برنامج الدوم نجلها الذي توفي منذ أيام.
أم علي فايز تنعيه بكلمات مؤثرة
وكتب الأم المكلومة عبر حسابها على فيسبوك: ماذا بينك وبين الله يا قطعة من قلبي، كنت دايما لوحدك بتكتب وتفكر وكنت بتقول ماليش أصحاب يا ماما طيب إزاي؟ قولي أفهمها دي إزاي ؟.. طيب الآلاف من الشباب اللي زي الورد ولاد وبنات اللي كانوا معايا وحواليا وعينيهم كلها حزن وألم وحب ووفاء نابع من القلب، وكل واحد فيهم مش عارف يعمل لي إيه عايزين يقدموا أي حاجة، يشيلوني من علي الأرض لو قدروا، لأني أمك حته منك دول كلهم إيه يا علي؟
بقيت التريند في مصر
وأضافت: ولا إنت يا بني اللي كنت مختلف وماكنتش لاقي اللي شبهك؟.. إنسان مش من الزمن ده وعشت في زمن غير زمنك، كان نفسك تحقق حلمك يا علي إنك تبقى مشهور، وكنت كاتب فوق سريرك أنا بكرة هبقى أكبر وأشهر ممثل في مصر، أديك بقيت تريند يا علي.
ليتك مكنتش عزاء بل مظاهرة وفاء
وتابعت: ربنا بيحبك أوي يا علي، حقق لك كل اللي نفسك فيه، وليلتك امبارح ماكانش عزاء، دي كانت مظاهرة حب ووفاء نابعة من قلب كل الناس اللي جم امبارح، كنت بتقولي نفسي أموت قبلك يا ماما علشان انتي اللي بيتفتح لدعاءك باب السما، وساعتها هدخل الجنة على طول ومن غير حساب وربنا حققلك أمنيتك.
أخدت جزء كبير من روحي وسبت ألم في قلبي
وأكملت: كنت عايز تفتحلي باب الجنة، وربنا حقق لك طلبك يا علي، وبصبري واحتسابي هدخل الجنة بسببك.. كنت عايز تروح لبابا ورحت يا سي علي.. مشيت يا علي وسبت قلبي فيه فراغ كبير أوي ولوعة وألم، وحاجات كتير يعجز قلمي إنه يوصفها.. جزء كبير من روحي أخدته ومشيت يا حبيب قلبي، بس عزائي إنك سعيد وفرحان وربنا راضي عنك يا حبيبي.
واستطردت حديثها قائلة: وأثلج صدري لما شفتك وشفت وشك الجميل بقلب الأم اللي بتشعر بضناها، أنت في مكان أحلي كتير من اللي إحنا فيه.. طلبتها ونلتها يا أعز الناس.. ربنا يرحمك ويغفر لك ويعفو عنك ويجعل مثواك الجنة.. وألقاك لما ربنا يأذن وساعتها إنت اللي هتتشفعلي يا علي وتاخد بإيدي لباب الجنة.
مع السلامة يا قطعة من الروح
واختتمت حديثها قائلة: مع السلامة يا أول من رأت عيني، مع السلامة يا أول فرحتي.. مع السلامة يا قطعة من الروح والقلب، مع السلامة يا علي يا فنان يا جميل.. ونلتقي عند وجه كريم.
