حسن يوسف يروي تفاصيل لقائه بالشعراوي واعتزال شمس البارودي: خسرت 40 ألف دولار بسببها
تحدث الفنان حسن يوسف عن كواليس لقائه بالشيخ الشعراوي لأول مرة، وتفاصيل اعتزال زوجته الفنانة شمس البارودي.
وقال حسن يوسف، خلال لقائه في أحد البرامج: أول مرة طلعت عمرة، كنت بصور فيلم شاطئ المرح مع ثلاثي أضواء المسرح ونجاة الصغيرة، في الإسماعيلية، اللي كان جوها مختلف وهواها نقي، قالوا لنا 5 دقايق راحة عشان مشهور أحمد مشهور رئيس قناة السويس وقتها كان عنده وفد وهيتغدوا، ولما مشهور عرف طلب أني اتغدى معاهم قلت لهم أنا معايا الاستاف عشان مايحسوش أني انفصلت عنهم، راح عزمنا كلنا كان محترم وطيب.
وتابع: جابوا له ورق وكان بيمضي عليه وفجاة سألني تطلع عمرة قلت له مش عارف يعني إيه عمرة قال لي أنا ماسك حج الأزهر، فهمني وكتب اسمي وقال لي روح لهم في نادي قناة السويس في جاردن ستي ومالكش دعوة بحد وحمايا والد شمس قال لي عاوز أجي معاك قلت أخده ونس.
وأشار إلى أنه تعرف على الشيخ الشعراوي هناك، موضحًا أنه بعدها بعام كان ينوي أن يؤدي العمرة مرة ثانية لكن طلب من شمس البارودي أن تذهب بدلًا منه لانشغاله بتصوير عمل، وقبلها بشهرين كان يحضر مع شمس لفيلم غرام صاحبة السمو واشترى لها ملابس من فرنسا بـ 40 ألف دولار، وحينما عادت من العمرة قررت الاعتزال، قائلًا: من يومها ماشفتش التمثيل لحد دلوقتي وخسرت 40 الف دولار وتغير الحال.
