حسن يوسف: قررت الاعتزال في السبعينات وعملت مشروعًا.. والشعراوي قال لي ربنا سخرك للفن
تحدث الفنان حسن يوسف عن كواليس عمله في مشروع بعيد عن التمثيل بعد قرار ابتعاده عن التمثيل، وذلك في أوائل السبعينات، مشيرًا إلى أنه فشل فشلًا ذريعًا، وتراجع عن فكرة المشروع بعد نصيحة الشيخ الشعراوي له.
وروى حسن يوسف تفاصيل النصب عليه خلال عمله في هذا المشروع خلال لقاء تلفزيوني، قائلًا: فشلت فشل ذريع، خدت أرض في الإسماعيلية 20 فدان وبقيت صاحب أملاك، وربنا رزقني بحارس محترف ربنا يسامحه، وأنا معرفش حاجة خالص كل شهرين تلاتة بلاقيه محضر لي ورقة قد كده يقول لي دي مصاريف وأنا مش فاهم حاجة خالص، وبقول له طيب عشان مش عاوز أطلع قدامه عبيط، بعد فترة ما لقيتش ولا حاجة والأرض صفرا وقال لي الماتور عطل وقعدنا شهرين مانسقيش.
واستكمل: جبت له 8 عجول فرزين وقلت بس بقى ده أنا هبيع لبن وهيبقى عندي مزرعة، بعد شهرين قال لي في عجلين ماتوا، لحقت منهم تلاتة، بعد ما زهقت كان ليا واحد صاحبي قلت له تعالى شيل الشيلة وهبيع الأرض، اتفاجأت أن حارس الأرض اللي جنبي قال لي إن الحارس في خطوبة بنته دبح عجل من العجول.
وأشار إلى أنه ذهب الشيخ الشعراوي ونصحه ببيع الأرض، قائلًا: قال لي أنت أصلا مزارع أو فلاح قلت له أبدًا، قال لي ما تشتغلش حاجة غير اللي ربنا مسخرك ليها عشان تنجح فيها، أنت ربنا مسخرك في شغلك وناجح، بيع واخلص وفعلًا بيعتها وخسرت 7 آلاف جنيه.
