مبروك عطية عن توزيع عظام ماشية على فقراء الإسكندرية: الماسورة بتعمل شربة عجمي
علق الدكتور مبروك عطية الداعية الإسلامي وعميد كلية الدراسات الإسلامية الأسبق بجامعة الأزهار، على واقعة توزيع عظام المواشي على بعض الأسر الفقيرة بمحافظة الإسكندرية.
وقال مبروك عطية خلال بث مباشر له على صفحته على موقع التواصل الاجتماعي فيس بوك: أي ذبيحة تذبح بيبقوا فيها لحمة وعظم وأجعص واحد بيقف عند الجزار يشتري 2 كيلوا لحمة، ويطلب ماسورة وعظمة لشربة المواسير.
فيه ناس بتكتك لخرابها
وأردف مبروك عطية: في عظم ذبيحة اتكوم وتم توزيعه على الناس كدا قامت القيامة يعني، وجه واحد معفن صور ونشر على السوشيال ميديا، وقال الحق دول بيوزعوا عضم على الناس، وعايز أقول في ناس بتكتك لخرابها.
وأردف مبروك عطية: فيه ناس عايزة تصور للناس إننا بنوزع على الناس عضم وهم معروفين وعايزين يخربوها، وهم معروفين ومش عايز أجيب اسمهم على لسانا.
واستكمل مبروك عطية: دينيا بقا هل يجوز تصور العضم ومتنشرش توزيع اللحمة، مينفعش هذا الكلام، مردفا: عايز أقول للناس دي عمركم ما هتوصلوا لهدفكم أبدا وبعد البلد دي ما استقرت عمركم ما هتحققوا هدفكم؛ لأن الناس بتشوف الاختيار وبتأكد معلوماتها.
من يوم ما ربنا خلق الكرم حط ثلاثة أرباعه في مصر
وأردف مبروك عطية بـ: اتقوا الله ولا تشوه صورة البلد، فمن يوم ما خلق ربنا الكرم حط ثلاثة أرباعه في مصر والربع للدنيا كلها، مستكملا: مصر أرق الناس قلوبا وأرحم الناس شئتم أم أبيتم.
والله أنا بشتريها وأنا بجيب اللحمة
وأكمل مبروك عطية: بتصور العضم، أنت مش عايز ماسورة هاتلي واحدة، والله أنا بشتريها وأنا بجيب اللحمة، بتعمل شربة عجمي، تتحط على حلة محشي.
كانت إحدى الجمعيات الخيرية، بمحافظة الإسكندرية، أعلنت عبر صفحتها الرسمية، بموقع التواصل الاجتماعي فيسبوك، توزيع 16 عظمة من عظام المواشي، على عدد 16 أسرة فقيرة، موثقة بالصور، لحظة انتظار هذه الأسر، اللاتي وصفتهن بالفقراء، لتسلم عظام المواشي، كصدقة لهم.
ووصف البعض من مستخدمي مواقع التواصل الاجتماعي أن تصرف الجمعية الخيرية، بتوزيع عظام المواشي على الأسر الفقيرة، بـ المن، مستنكرين وصف الأسر بالفقيرة، فضلا عن أن تسليمهم عظام المواشي فقط، دون لحومها، فيه مزيد من الإهانة لهم.
