كان كل يوم بيهدده بالقتل.. ننشر أقوال والد ميكانيكي المرج في التحقيقات
أقدم سائق توك توك، على قتل أحد الأشخاص يدعى أدهم 33 سنة، يعمل ميكانيكي مركبات التوكتوك بمنطقة كفر الشرفاء التابعة لحي المرج بمحافظة القاهرة، مستخدمًا سلاحًا أبيض - مطواة، وعمل على تجهيزه قبل أيام من حدوث الواقعة، بسبب خلافات مادية بينه وبين المجني عليه المعروف إعلاميًّا بـ ميكانيكي المرج.
أقوال والد ميكانيكي المرج
حصل القاهرة 24 على نص التحقيقات في القضية، 12427 لسنة 2021، إداري المرج، وجاءت أقوال والد المجني عليه ويدعى عمر محمد على كالآتي:
س: ما صلتك بالمتوفى أدهم عمر محمد علي مصطفى؟
ج: هو ابني.
س: ما معلوماتك بشأن الواقعة مجل التحقيق؟
ج: اللي حصل إن أنا شغال مبيض محارة، وكان ابني الكبير هو اللي بيصرف علينا في البيت، وكان شغال میکانیکي تكاتك وموتوسيكلات، وكان قالي من فترة إنه اتوسط لمحمد.ع المتهم، وشهرته حماصة، وفعلا جابله توك توك، والكلام ده كان من نحو 8 شهور، وطول الفترة دي بيجي لأدهم ويخليه يصلح التوك توك ده ببلاش على أساس أنه هو اللي جابهوله، وكان بيستغل كده علشان مايدفعش فلوس التصليح، وأدهم لما لقي العملية كده رفض أنه يصلحله التوك توك تاني ببلاش، بدأ يضايقه كل شوية ويهدده أنه هيخلص عليه، ويوم الواقعة اللي حصل ان ابني أدهم بعد ما خلص شغله على الساعة 12 بالليل وقبل ما يروح بيقعد على قهوة اسمها فتح الله.
بعدين عدّى عليه محمد عادل وشهرته حماصة، واتكلم معاه، وقاله انت ايه اللي مقعدك هنا، ورد عليه ابني وقاله وانت مالك، راح ابني سابه ومشي، وحماصة راح وراه وقاله مش عاوز أشوف وشك تاني، راح ابني أدهم رد عليه وقاله انت عاوز إيه يابني، وفجأة قام حماصة وطلع المطواة وضرب أدهم في رجله اليمين، وأدهم وقع والناس أخدوه على موتوسيكل، وراحوا بيه على مستشفى اليوم الواحد، وساعتها جالي تليفون من مرات ابني التاني وبيقولي إن أدهم اتعور من حماصة وراح على المستشفى وأنا ساعتها جريت على المستشفى، ولما وصلت لقيت أدهم على الترولي وإیده مدلدلة ومافيش نبض والتمرجي قالي إنه خلاص توفي.
ما السبب ومناسبة وجود المجني عليه بالزمان والمكان سالِفَي الذكر؟
ج: هو كان لسة مخلص شغل في الورشة وقاعد على القهوة دي قبل ما يروح بيشرب كوباية قهوة.
س: وما علاقتك بالمتهم محمد.ع؟
ج: مافيش أي علاقة غير إنه هو اللي كان بيتعامل مع أدهم ابني في موضوع التكاتك دي بس.
س: ما مناسبة لقاء نجلك بالمتهم؟
ج: اللي أنا سمعته زي ما قلت كده إن أدهم ابني كان قاعد على قهوة فتح الله بيشرب كوباية قهوة، وعدّى عليه حماصة وبدأ يشاكله.
س: وما كيفية حدوث إصابة نجلك المجني عليه تحديدًا؟
ج: بعد ما أدهم ابني رد على حماصة بالطريقة دي والكلام ما عجبهوش قام مطلع مطواة من جنبه وضاربه بيها.
س: وما هي إصابة نجلك تحديدًا؟
ج: هو مصاب في فخذه اليمين.
س: ما قولك فيما أقره المتهم من أن نجلك المتوفى تعدى عليه بهاتف محمول في وجهه، وأحدث به إصابة، وعلى أثر ذلك توجّه المتهم إلى مكنة وأحضر سلاحًا أبيض مطواة متجهًا إلى المجني عليه، وتعدى عليه وأحدث إصابته في الفخذ اليمنى مما أدى إلى حدوث وفاته؟
ج: الكلام ده محصلش، وموضوع التوك توك ده من فترة طويلة، لكن هو كان على طول بيهدد ابني إنه هيخلص عليه.
س: وهل شاهدت واقعة تهديد المتهم لنجلك؟
ج: لا بس أصحاب أدهم هما اللي شافوا.
س: وما بياناتهم تحديدا؟
ج: إبراهيم صاحبه وشهرته إبراهیم لولو.
س: ما كيفية تهديد المتهم لنجلك وما وسيلته في ذلك؟
ج: هو كان بيهدده في وشه وبيقوله أنا مش هحلك ولازم أقتلك.
س: ما قولك فيما هو ثابت بالتقرير الطبي الخاص بالمجني عليه نجلك أدهم وما ثبت به من إصابات؟
ج: أيوة هي دي الإصابات الموجودة في ابني.
س: هل المتهم محمد.ع وشهرتة حماصة هو محدث تلك الإصابات؟
هو ضربه ضربة واحدة بس في الفخذ الأيمن بالمطواة.
س: ومن محدث باقي الإصابات الموجودة في الساق اليمني أيضًا من سحجات شديدة للجلد؟
ج: دي ممكن تكون من سخونة الموتسيكل اللي الناس أخدوه عليه وهو رايح على المستشفى.
س: هل لديك أقوال أخرى؟
ج: لا.
