فى واقعة فيديو السجود للكلب.. الممرض: أنا قلت كلب مايستاهلش والإنسان أولى بالفلوس | نص تحقيقات
حصل القاهرة 24 على نص التحقيقات في واقعة طبيب الكلب والذى أجبر ممرضًا على السجود للكلب المتهم فيها الدكتور عمرو خيري، رئيس قسم العظام بجامعة عين شمس، وطبيب آخر بمستشفى النزهة الدولي، وموظف بنفس المستشفى، بتهمة إهانة ممرض والتنمر عليه والسخرية منه.
قال الممرض المجني عليه عادل سالم، ضحية السجود للكلب في التحقيقات إنه تعرض للسخرية بعد نشر فيديو مدته 4 دقائق وتداوله رواد السوشيال، مشيرًا إلى أن من ظهروا في الفيديو هم عمرو رفعت سكرتير العيادة، والدكتور معتز مسعد، والدكتور عمرو خيري، المتهمون في القضية.
تابع الممرض في واقعة السجود للكلب بأن من كان يوجه إليه الإساءات هو الدكتور عمرو خيري، لكنه لم يظهر بصورته في الفيديو، وأن الفيديو المتداول تم تصويره من 6 أشهر في مستشفى النزهة الدولي في عيادة العظام في الدور الأرضي، وحول معرفته بتصوير الفيديو قال إنه علم بالتصوير في أثناء الحوار.. وإلى نص التحقيقات:
س. هل الفيديو الذي تم عرضه عليك حدث به أي تعديل أو تحريف من حيث محتواه؟
ج. لا الفيديو ده صور اللي حصل معايا حتى آخره.
س. ومتى تحديدًا تم التقاط ذلك المقطع المرئي الثابت به الواقعة محل التحقيق، وأين تم تصوير ذلك المقطع المرئي؟
ج: من نحو 6 أشهر، وتم تصويره في مستشفى النزهة الدولي في عيادة العظام في الدور الأرضي.
س: وأين يقع مستشفى النزهة الدولي؟
ج مستشفى النزهة الدولي مقره في مساكن شيراتون متفرع من ش سيد زكريا مصر الجديدة دائرة قسم النزهة.
ممرض واقعة السجود للكلب: ذلوني وضربوني
س: وما علاقة مستشفيات جامعة عين شمس بالواقعة محل التحقيق؟
ج. مستشفيات جامعة عين شمس ليس لها أي علاقة بالواقعة محل التحقيق.
س: وما تعليلك فيما ذكر بعنوان المقطع الذي تم عرضه عليك؟
ج: أنا أظن عشان الدكتور عمرو رئيس قسم العظام بكلية طب جامعة عين شمس اتكتب كده لكن الواقعة حصلت في مستشفى النزهة.
س: وما الآلة التي استخدمت في تصوير ذلك المقطع الذي تم عرضه عليك؟
ج تم تصوير الفيديو عن طريق الموبايل.
س. ومن هو القائم بتصوير ذلك المقطع المرئي الخاص بالواقعة محل التحقيق؟
ج: الدكتور عمرو خيري هو اللي صورني.
ممرض اسجد للكلب: كنت خايف على أكل عيشي والكلب بـ 20 ألف جنيه
س. وملك من ذلك الهاتف المحمول الذي تم تصوير ذلك المقطع من خلاله؟
ج: التليفون بتاع دكتور عمرو.
س: هل كنت على علم بأمر تصوير ذلك المقطع المرئي؟
ج: أيوه عرفت في أثناء الحوار، لكن لما دخلت الغرفة ماكنتش أعرف إنه بيصور.
س: هل كان موضع الهاتف المستخدم في تصوير ذلك المقطع ظاهرًا أم مخبأ؟
ج: هو كان ماسكه في إيده بس مكنش باين إنه بيستخدمه في التصوير.
س: هل توجد كاميرات مراقبة بمحل الواقعة؟
ج. فيه كاميرات في المستشفى بس برة الأوضة اللي حصل فيها الواقعة.
س: حدثنا عن طبيعة وظيفتك.
ج. أنا ممرض طوارئ وممرض عيادات العظام في مستشفى النزهة الدولي.
س. صف لنا طبيعة هذه الوظيفة من حيث الاختصاصات التي تمارسها في أثناء عملك.
ج. أنا بكون مساعد للطبيب اللي موجود في العيادة في حالة تغيير جبس أو تركيبه أو أي حاجه بيطلبها الدكتور.
س. وأين تحديدًا تمارس هذه الاختصاصات؟
ج. أنا بكون مصاحب للدكتور في الغرفة المخصصة للعيادة أو غرفة التركيبات.
س: هل متاح للعامة الدلوف لتلك الغرف في غير حالات الكشف؟
ج: لا المريض والمرافق اللي معاه ساعات الكشف بس.
س: منذ متي وأنت تباشر مهام تلك الوظيفة؟
ج: أنا شغال في مستشفى النزهة الدولي منذ نحو عشرين سنة.
س. وما مواعيد عملك؟
ج. منذ الساعة 2 الظهر حتى الـ 9 مساء.
س. وما ظروف وملابسات المقطع المصور المعروض عليك؟
ج. هو أنا أولا كنت في الفترة دي شغال في عيادة العظام، والشيفت اللي اتصور فيه الفيديو ده كان الشيفت بتاع الدكتور عمرو خيري، وهو استشاري عظام، وكنت قبلها لاقيت الدكتور عمرو حزين بصورة مبالغ فيها فسألته وعرفت منه إنه كان بيربي كلب والكلب ده توفي، وإنه اشترى واحد جديد بنحو 20 ألف جنيه، فأنا أخدت منه الكلام وكنت بدردش مع دكتور معايا في المستشفى اسمه معتز على قبيل الدعابة.
الممرض في واقعة السجود للكلب في التحقيقات:
قلت إن المبلغ ده كبير على كلب مايستهلش، وإن الإنسان أولى بالفلوس ديه، وأنا لو أخدته البلد عندي القلج ودي القرية اللي أنا منها الكلاب اللي بتقف على الترعة هتقطعه، ومكنتش أعرف إن الكلام ده هيوصل لدكتور عمرو وهيزعله، وفي اليوم اللي اتصور فيه الفيديو بعد ما الحالات خلصت دخل الدكتور معتز لدكتور عمرو وقفلوا عليهم، وكان معاهم السكرتير عمرو رفعت، وبعدها لقيت الدكتور معتز بينده عليا وبيقولي كلم دكتور عمرو، فدخلت أشوف فيه إيه لقيت الدكتور معتز قفل الباب عليّا من جوا وفضل واقف على الباب، وابتدى الدكتور عمرو يعاتبني على الكلام اللي وصله، وبيطلب مني الأفعال اللي ظهرت في الفيديو.
س. وما نوع ذلك الكلب ومواصفاته؟
ج، معرفش.
س، ومن هو من يُدعى الدكتور معتز؟
ج. هو اسمه معتز مسعد وده مدير الطوارئ في مستشفى النزهة الدولي.
س. وما مضمون الحوار الذي دار بينك وبين سالف الذكر ومتى دار تحديدًا؟
ج. هو أنا لما كان تلاحظ غن دكتور عمرو دايمًا زعلان وحزين وإنه اشترى كلب جديد بدل اللي مات بعشرين ألف جنيه، كنت بتكلم مع الدكتور معتز بحسن نية، إن أنا مستغرب إن فيه كلب بالمبلغ ده، وإنه زيه زي كلاب الشارع اللي بنربيها عندنا في البلد.
س. وماذا كان انطباع سالف الذكر حيال ما ورد على لسانك في هذا الحوار؟
ج. هو كان بيجاريني في الكلام أتاريه هيبلغ دكتور عمرو باللي أنا قلته.
س. وهل كنت تعتقد أن ما ورد على لسانك يستأهل عقابًا؟
ج. لا ده كلام عادي خالص ومكنتش أعرف إنه هينقله لدكتور عمرو ولا أعرف إنه ممكن يوصل لرد الفعل ده.
س. كيف قام من يُدعى معتز مسعد بنقل حديثك لعمرو خيري؟
ج. هو في اليوم اللي اتصور في الفيديو وبعد ما الدكتور عمرو خلص حالاته لقيت الدكتور معتز جاي من شغله وساب عيادة الطوارئ، ودخل قعد ما الدكتور عمرو والسكرتير بتاعه وقفل عليه الباب.
س. وأين كنت في تلك الأثناء؟
ج. كنت قاعد في الطوارئ بشوف شغلي التاني.
س. صف لنا الغرفة التي تم تصوير ذلك المقطع فيها؟
ج. هي غرفة الكشف اللي موجودة اللي في الدور الأرضي في عيادة العظام في مستشفي النزهة الدولي.
حدد لنا الكيان القانوني لمستشفى النزهة الدولي
س. وما علاقة من يُدعى عمرو خيري بالمستشفى جهة عملك؟
ج. هو الدكتور عمرو أخصائي عظام ورئيس قسم العظام بكلية الطب جامعة عين شمس، ومتعاقد مع مستشفى النزهة على مباشرة عمل أخصائي عظام بالعيادات الخارجية.
س. وهل يباشر سالف الذكر تلك الوظيفة باعتباره موظفًا عامًا؟
ج. لا دي تبقى زي عيادة خاصة يتقاضى عليها أجرًا.
س. وما صلة من يُدعى معتز مسعد بالمستشفى جهة عملك؟
ج. هو دكتور معانا في مستشفى النزهة بس أنا معرفش صلته بالمستشفى شكلها إيه وهو مختص بمدير الطوارئ.
س. حدد لنا الأفعال التي طلبت منك حال دلوفك لغرفة الكشف ممن يدعى معتز مسعد؟
ج: أنا لما دخلت لقيت الدكتور معتز واقف ورا الباب، وقفل عليّا، وبدأ الدكتور عمرو يعاتبني - الكلام اللي سمعه ونقلهوله دكتور معتز - وطلب مني دكتور عمرو خيري أنط من فوق الحبل وطلب مني أسجد للكلب.
س. ومن كان موجودًا في تلك الغرفة في تلك الأثناء؟
ج. هي الأوضة كان فيها تلاتة زي ما قلت، الدكتور عمرو خيري والدكتور معتز مسعد والسكرتير عمرو رفعت.
س. وما مضمون الحوار الذي دار بينك وبين من كان موجودًا في تلك الغرفة؟
ممرض الكلب يكشف سبب تصوير فيديو اسجد للكلب
ج. بعد ما دكتور معتز قفل الباب الدكتور عمرو بدأ يوجّه ليا اللوم إن أنا إزاي أتكلم على | الكلب بتاعه، وأنا رديت عليه إني كنت بهزر، وفي الوقت ده قرر إنه يعاقبني، وطلب مني أعمل الأفعال اللي ظهرت في الفيديو.
س. صف لنا تلك الأفعال علي وجه التحديد.
ج. أنا لقيتهم جايبين سلك كهرباء طويل، كان ماسك طرفيه الدكتور معتز والسكرتير عمرو، وعاوزني أنط من فوقيه أتاري الدكتور عمرو كان بيصور.
س. وما مدلول تلك الأفعال من وجهة نظرك؟
ج. أنا شفتها من قبيل العقاب والإذلال.
س. وهل استجبت لما طلبه منك المشكو في حقه؟
ج: أيوه.
س. وما الذي دعاك إلى تلك الاستجابة؟
ج لأن الدكتور طلب مني، ده والدكتور معتز مدير الطوارئ، وأنا كنت خايف على أكل عيشي، فقلت مفيهاش حاجة لو نفذت الحاجات اللي بيطلبوها مني خصوصا إني مكنتش أعرف إنهم بيصوروا.
س. وماذا في حال ما إذا كنت رفضت هذا الأمر؟
ج. معرفش هما كانوا ممكن يعملوا إيه، وأنا كنت خايف على أكل عيشي خصوصًا إن الدكتور عمرو كان ماسك في إيده عصايا وبيهددني بيها، ولما مكنتش بكمل كان بيضربني.
س. صف لنا الأداة التي كان يحرزها المشكو في حقه.
ج. هي كانت عصاية خشب.
محاكمة الدكتور عمرو خيرى طبيب اسجد للكلب
أجلت المحكمة الاقتصادية، أمس السبت، أولى جلسات محاكمة الطبيب عمرو خيري وآخرين في واقعة السجود للكلب، ويواجه المتهمون التنمر على الممرض عادل سالم، واستغلال الوظيفة وإجباره على السجود للكلب، لجلسة 25 سبتمبر الجاري للاطلاع.
كشفت التحقيقات في الواقعة، أن الطبيب عمرو خيري وآخرين، تنمروا على الممرض عادل سالم بأحد المستشفيات الخاصة، حيث ارتكب ممَّن لهم سلطة عليه بالقول، واستعراض القوة قِبَله وسيطرتهم عليه، واستغلالهم ضعفه؛ بقصد وضعه موضع السخرية والحطّ من شأنه في محيطه الاجتماعي، واستغلالهم الدين في الترويج لأفكارٍ متطرفة بقصد إثارة الفتنة وازدراء أحد الأديان السماوية، وتعديهم على المبادئ والقيم الأسرية في المجتمع المصري، ونشرهم عن طريق الشبكة المعلوماتية وبإحدى وسائل تقنية المعلومات، تصويرًا مرئيًّا ينتهك خصوصية الممرض المجني عليه دون رضاه، واستخدامهم موقعًا وحسابًا خاصًّا على الشبكة المعلوماتية بهدف ارتكاب تلك الجرائم.
