بعد وفاة شقيق رامي صبري.. عبير صبري تناشد الدولة بوضع حد لنشر أخبار المشاهير
ناشدت الفنانة عبير صبري المجلس الأعلى للصحافة ومجلس النواب بوضع حد لنشر الأخبار الشخصية الخاصة بالمشاهير، وذلك بعد وفاة شقيق المطرب رامي صبري.
ونشرت عبير صورة رامي صبري وشقيقه كريم، عبر حسابها الشخصي على موقع تبادل الصور والفيديوهات القصيرة “انستجرام”، وعلقت قائلةً: “ربنا يرحم الشاب كريم صبري ويعفو عنه ويغفر له.. شقيق الفنان رامي صبري الحقيقة أنا بناشد كل المؤثرين على السوشيال ميديا أنهم يطالبوا المجلس الأعلى للصحافة ومؤسسات الدولة المصرية مجلس النواب أنها توضع قوانين لتنظيم النشر ووضع حدود للأخبار الشخصية اللي بتخص المشاهير في أي مجال فني أو غيره مش معقول”.
وتابعت: “ولا مقبول إن شاب يتوفى في حادث غرق وننشر شيء خاص بمرضه ومنحترمش مشاعر عيلته أمه وأبوه وأخواته ونتاجر بأخبار الشاب المسكين والإدمان بالمناسبة مرض أكرر مرض زي السكر والضغط والأمراض المزمنة يعني مش قلة أدب ولا قلة تربية زي ما أغلب الناس فاهمة وعاوز علاج وله مستشفيات خاصة مش معقول المواقع كلها تتسابق في نشر تفاصيل خاصة بمرضه وتجرح أهله وكان مش كفاية مصيبتهم وحسرتهم على ابنهم وطبعًا أذية الفنان رامي صبري والإساءة لسمعته لأنه مشهور والناس تموت في الفضايح أنا مش عارفة هتستفيدوا إيه مفيش رحمة بالأهل”.
وأضافت: “مفيش أخلاق الستر مفيش أخلاق إنك متتدخلش في شيء لا يعنيك ولا يعني جمهور السوشيال ميديا؟ ليه القسوة والرغبة في دبح الناس معنويًا خصوصًا لو كان مشهور مش كفاية اللي هما فيه انتوا يعني مش عارفين إن كل البيوت فيها مشاكل وأمراض وبلاوي مقفول عليها بابها.. إيه السبب إنكوا تنشروا بهدف إحراج الناس وهتك أسرار البيوت ؟ عشان فيها شخص مشهور زي الفنان رامي صبري فنبهدله ونطلع أسرار أخ له توفي وهو يعاني مرض من الله زيه زي ملايين الشباب”.
واختتمت عبير صبري حديثها، قائلًا: “عشان الترند والمشاهدة أقولكم إيه بس أنا قلبي وجعني على الشاب المسكين ده ومعرفوش لكن بتمني له الرحمة والمغفرة بعد موته الصعبة ولأهله الصبر أمه وأبوه وأخوه ربنا يصبرهم وبناشد تاني كل المؤثرين على السوشيال ميديا ينضموا ليه ويطالبوا المجلس الأعلى للصحافة بتنظيم النشر وعدم هتك أسرار الناس واغتيالها معنويًا دون داعي ما دام شيء شخصي لا يفيد مجرد كومنتات شتايم ولايكات وترندات هتسألوا عليها يوم القيامة في مظالم حقوق العباد”.
