مرتضى منصور يعلق على قرار عودة الدوري.. وبلاغه ضد الخطيب واستكمال الزمالك للموسم
علق رئيس نادي الزمالك مرتضى منصور على قرار الدكتور أشرف صبحي وزارة الشباب والرياضة بعودة النشاط الكروي من جديد بداية من 25 يوليو المقبل.
وقال مرتضى منصور خلال تصريحاته لبرنامج “زملكاوي” الذي يذاع عبر قناة نادي الزمالك: “وزير الشباب والرياضة مع احترامي بيهزر، كيف سيعود الدوري مع تزايد عدد حالات الإصابة بفيروس كورونا وكذلك أعداد الوفايات؟”.
وتابع: “كان واحد بيموت في الأسبوع والدوري وقف، ودلوقتي بيموت ألف 1000 شخص وعايزين الدوري يرجع عشان خاطر الأهلي، قولوا بشكل مباشر أن الدولة عايزة الدوري يرجع عشان الأهلي مخدش بطولات السنة دي”.
وأردف: “أنت مش بتتعامل مع خرفان إحنا لينا لرأي وفيه 14 نادي رافض عودة الدوري عايزين ترجعوا الدوري؟ رجعوه بالأربع فرق اللي عايزة تلعب”.
مرتضى لـ”الأهلي”: هل تم دفع الجمارك الخاصة بساعات تركي آل الشيخ؟
وواصل: “الدوري مش هيرجع ومفيش ماتشات وفيه 14 نادي رافض لعودة الدوري وخايفين على اللاعيبة، وزير الشباب والرياضة خايف من الأهلي وتركي آل الشيخ يحاول التواصل معه ولا يرد عليه، لماذا تجامل الأهلي يا وزير؟”.
وشدد: “الأندية مفلسة الدوري هيرجع إزاي، محمود سعد اللي بيشتغل في اتحاد الكرة تعرض للإصابة بفيروس كورونا وعايزين الدوري يرجع”.
وعن رسالته لمحمود الخطيب، أجاب قائلاً: “مش هسيب حق الزمالك يا خطيب في قضية نادي القرن”.
وتابع: “الخطيب وحرمه ونجلته حصلوا على ساعات من تركي آل الشيخ والكل اعترف بكدة في قناة الأهلي، الأهلي مش هيدير الكورة في مصر، ومش هنسمح لأي نادي يعملها، مفيش نادي واحد هيدير على مزاجه”.
وأردف: “أقدم بلاغي أتهم فيه رئيس الأهلي بالتحريض على مسئولي الزمالك من خلال عرض التجاوزات التي تمت عبر قناة النادي الأحمر”.
مرتضى منصور: قررت رفع دعوى لسحب ترخيص قناة الأهلي بسبب التجاوزات
وأوضح : “الخطيب ومنظومة الأهلي بالكامل متهمين بالتحريض ضد الزمالك بعد التجاوزات التي حدثت في قناة الأهلي”.
وتطرق مرتضى منصور مرة أخرى للحديث عن قرار استئناف الدوري، حيث قال: “إزاي هتحملني مسئولية إصابة أي لاعب بفيروس كورونا، مش هتحمل مسئولية روح”.
وواصل: “معنديش مشكلة الأهلي ياخد الدوري، مقابل الحفاظ على صحة الجميع”.
وعن استكمال الزمالك بطولة الدوري حال عودته، أشار: “قولاً واحدًا الزمالك مش هيكمل الدوري الموسم ده”، لافتًا إلى أنه اتخذ هذا القرار ده لخوفه على حياة لاعيبة فريقي وحياة كل اللي شغالين في المنظومة الرياضية.
وأنهى منصور حديثه بانتقاد عمرو الجنايني رئيس اتحاد الكرة، أتم: “الأخ عمرو الجنايني بيقول معندناش مشكلة في عودة الدوري وعايز الأندية تبصم وتمشي لا أنا مش بعرف أبصم وأمشي يا عمرو، اتحاد الكرة بيخاف من الأهلي ومش عايز صدام وده على حساب أرواح اللاعيبة وكل المنتميين لمنظومة الكورة، اتحاد الكرة معرفش يحمي محمود سعد اللي بيشتغل في الاتحاد يبقى هيحمي اللاعيبة إزاي”.
مرتضى منصور: عودة الدوري صعبة.. و14 ناديا رفضوا
