التهامي ينشر جلسة تصوير مع “كلب ياسين”: “ربنا مخلقش حاجة نجسة” (صور)
طالب المنشد محمود التهامي رئيس نقابة المنشدين في مصر، بضرورة مراجعة الأقوال التي ذكرت بأن الكلاب “نجسة” ولا يصلح تربيتها، مشيرًا إلى أنهم بالمنزل لديهم كلب معروف باسم كلب ياسين في إشارة إلى شيخ المنشدين ووالده ياسين التهامي.
وقال التهامي في تدوينة على حسابه الشخصي في موقع التواصل الاجتماعي “فيس بوك”: “الناس اللي بتهري ما حكم تربية الكلاب، وأنها نجسة، وحكم لعاب الكلب، والهوجة غير الإنسانية في قتل وسم وتعذيب الحيوانات، نتكلم بالحب والعقل والدين بردو”.
وأضاف: “عن تجربة شخصية وبالصور، الترحيب والحفاوة اللي بيستقبلني بيها “كوستا” كلب ياسين والثائر، بعد ما ارجع من السفر. أو الحفلة أو المكتب، كفيلة إنها تنسيني تعب بني أدمين كتيييير بنقابلها كل يوم، فلا يوجد في القرآن ولا السنة حاجة قالت إن الكلب نجس، الكلب مذكور في القرآن كـ”فرد وصاحب” لأهل الكهف مش حارس ولا تابع ليهم “رابعهم كلبهم، سادسهم كلبهم، ثامنهم كلبهم”، وإن في القرآن حلال صيد الكلب “فكلوا مما أمسكن عليكم”، الصيد اللي الكلب هيجيبه ببقه وهينزل عليه لعابه!”.
وأكمل: “إن الأصل في الإسلام طهارة كل الحيوانات مالم يرد نص صريح بنجاستها، وإن المشكوك فيه طاهر حتى تثبت نجاسته، وإن الخنزير بذات نفسه طاهر، لحمه بس هو اللي حرام أكله، النجاسة وردت تفسيرًا “واجتهادًا” من الأئمة وفي مذهب “كامل” زي المالكية قالوا في طهارة الكلب كله، والأئمة اعتمدوا على حديث واحد عن غسل الإناء اللي اتقال في تفسيرات تانية إنه إناء الشرب بس مش إناء الوضوء، واللي اتقال في وقت رواية الحديث إن الكلاب والقطط كانوا طوافين وطوافات على بيوت ومساجد المسلمين بيشاركوهم الاكل والشرب، ف اللي اتقال ببساطة متشربش مع الكلاب ف طبق واحد ولو كلب شرب من طبقك اغسله قبل ما تشرب فيه، وعرفنا بعدين من العلم الحديث ليه “مرض مميت زي السعار اللي بيتنقل عن طريق لعاب الكلب، ولا مياه ولا صابون هيشيلوا الفيروس، هيموته بس التراب”.
واختتم: “وهناك حديث واضح وصريح ومثبت في صحيح البخاري عن ابن عمر قال: “كانت الكلاب تقبل وتدبر في مسجد رسول الله صلى الله عليه وسلم ولم يكونوا يرشون شيئًا من ذلك” أو كما قال. وفي سنن أبي داود: “تبول وتقبل وتدبر ولم يكونوا يرشون شيئًا من ذلك”. في المسجد.. الكلاب كانت بتدخل وتخرج وتعمل حمام في بيت ربنا اللي بيصلوا فيه، ولا كانوا بيسموهم ولا يضربوهم بالنار ولا يكسروا عضمهم بالشوم علشان ده بيت ربنا، ولا كانوا بيطردوهم، ولا حتى كانوا بيرشوا وينضفوا مكان الحمام بتاعهم، رغم إن في رواية تانية راجل غير عاقل بال في المسجد فأمر النبي بالرش مكان بوله “عن أبي هريرة رضي الله عنه قال: بال أعرابي في المسجد فقام الناس إليه ليقعوا فيه فقال النبي صلى الله عليه وسلم : دعوه وأريقوا على بوله سجلًا من ماء، أو ذنوبًا من ماء، فإنما بعثتم ميسرين ولم تبعثوا معسرين. رواه البخاري”، يعني فضلات الكلب طاهره لكن الكلب نجس؟؟؟!، اللي يقولك الكلب نجس، قوله ربنا مخلقش حاجة نجسة!.من لا يرحم. لا يرحم”.
