الشاعر عمرو حسن يلخص 2019 بطريقة كوميدية في قصيدة (صورة)
نشر الشاعر عمرو حسن، عبر حسابه الشخصي بموقع التواصل الاجتماعي “فيس بوك”، قصيدة شعرية بطريقة كوميدية ساخرة يودع بها عام 2019 ويستعد للعام الجديد 2020، تحتوي القصيدة على حصاد خلاصة أهم الأحداث التي حدثت في عام 2019 بطريقة مبسطة وسهلة.
وكتب ” وداع_٢٠١٩
الساعه ف ايدك كام ؟
الساعه ف ايدي سنين
انا قصدي الساعه الساعه ؟
حداشر تسعه وخمسين 11:59
ستين ثانيه
وهنبدا بكره وسنه تانيه
مضروب بالجزمه من الدنيا
ولازلت بتفرح ف الاعياد !
قلبك ده جميل والله يا واد
طيب ورقيق
اوسع من ارض مبتسعناش
فاضل خمسين ثانيه ف ساعتك مين لسه مجاش ؟
كلمت اصحابك ومعارفك
كل اللي يكون فعلا عارفك
ولا انت اخترت الناس بالاسم ؟
فكرت ف مين ؟
مين اكتر حد قريب ليك في البني ادمين ؟
اصحاب كانوا ليك
ولا البنت اللي عايزها معاك
كان مين قالك انها فكراك
هي زمانها بتضحك وياه
وبتملا الشجره بزينة العيد
فاضل تلاتين ثانيه ف ساعتك
وانت كعادتك حزنان وسعيد
تلاتين ثانيه تقدر تصنع فيهم دنيا
كأس افريقيا ، وردة فضحنا ، باي يا أجيري ، اتفسحنا ، كايا وسارة ، أوضاع مبتذلة ومنهارة ، شوفت التيك توك ؟ روح لاديداس هتلاقي فلوس ، ومافيش أحلام ينفعها فانوس ، مرتضى متحصن بحصانه ، رانيا مافيش ليها بطانه ، الناس عطلانه على الفيسبوك. ، ورضوى مافيش منها الا بلوك ، نطيت م البرج تعاقب مين ، ياشباب بتموت شاردين خايفين ، خالد يوسف وحّد قطرين ، خالك عرفات له ليله ف ام المصريين ، بتكلم مين ، مش سامعك علشان جنب دي چي ، ماحدش طمّن هيثم ليه ، رضا عبد العال يكسب رهانات ، وعلاء عبعال يعمل لقاءات ، ومحمد علي فتح الموضوع ، انا هابني قصور مش فارقه الجوع ، علشان تذكره زقوه م القطر ، شفت فلوكس بعد ماقتلوه ، اتعين مندوب الأخلاق ، ياما استحملت جراح ياعراق ، لبنان عملت ثورة نضيفه ، يافا بتبكي ف أحضان حيفا ، الكون داير وانت مُتابع ، شوفت اوريجي حط الرابع ، جسدي لا يرحم وهجيب ميت جون ، تسريب مرتضى فيديو وتليفون ، كهربا لف اللفه إياها ، وحاجات بالعافيه قفلناها ، ناس مشيوا صحيح بس ارتاحوا ، عادل شكَل له كام ناحو؟ ، تلات بنات شافوا عمرو دياب ، كان يوم تلات والعيشه هباب ، سميه بتسيب كالعاده وسعد كالعاده بيتساب ، واقع مريض اعلام كدّاب ، أبو مكه خد دوري الابطال ، وماني بقى رمز السنغال ، والسيسي جاب م الشعب عيال ، ومافيش كلام ينفع يتقال ، الشعب ضاع والمجلس نام ، وبقينا بس عبيد لكلام ، ادي ال سعود فتحوا الحفلات ، وادي طبالين كتبوا ف مقالات ، تريكه لسه نضيف وكريم ، وموسى لسه خبيث ولئيم ، وائل غنيم هربت منه ، ومعز شيري بعدت عنه ، والناس لازالوا بيئنّوا ، فيه ناس ف أبراج بيغنّوا ، وناس ف عزله عن الدنيا
فاضل ثانية
فاضل ثانية
فكّر علي طول
واللي يجيلك علي بالك قول
” اهي سنه فاتت وانا اهو مكمل واللي بيصبر لازم هينول “.
وفي وقت سابق، أصدر الشاعر عمرو حسن 4 دواوين شعرية، هي: المهنة برقص وسيلفي وناس كافيه خلال الأعوام الماضية، وحاليًا صدر له ديوان “الوردة البلاستيك”، بمعرض الكتاب، حققت أعماله نجاحًا كبيرًا ودخلت ضمن قائمة الأعمال الأعلى مبيعًا.
