باسم سمرة: كنت خايف إن عادل إمام يضايقني وأرد عليه.. وكنت بصاحب أكتر من واحدة في نفس الوقت
تحدث الفنان باسم سمرة عن تفاصيل تعاونه مع الزعيم عادل إمام في فيلم عمارة يعقوبيان، بجانب حديثه عن عمله كمدرس مدرسة ثانوية قبل دخوله الوسط الفني.
وقال باسم سمرة في تصريحات إذاعية: كنت خايف من عادل إمام أنه يضايقني لأني هرد عليه، أنا مش بسكت وهخسره ودي كارثة، أصل هرد على مين؟.. الزعيم، كنت في فيلم عمارة يعقوبيان وكنت رايح أقدم ولابس أشيك حاجة عندي، وقالي حلو أوي لبس الشخصية قولتله ده لبسي أنا مش الشخصية.. وتوددت العلاقة وبقى بيحبني.
وعن فترة عمله كمدرس ثانوي، أضاف باسم سمرة: أنا مُدرس ثانوي، والطلاب كانوا أصحابي، ومهم في التدريس يحصل علاقة حب وصداقة وجدعنة بين الطالب والمُدرس، وموضوع إنك تضرب شاب ده هتكسره هيكرك، ويكره المادة، وبعدين أنا مسافر ساعتين علشان أضرب الطلاب؟، بالعكس لغاية دلوقتي علاقتي بيهم حلوة.
باسم سمرة: كنت بصاحب أكتر من واحدة في نفس الوقت
كما تحدث باسم سمرة عن السيدات وعلاقاته العاطفية في شبابه، قائلًا: أحلى حاجة في الست إنك تبقى مطمن على نفسك وبيتك وعلاقتك معاها.. الراجل فيه حتة طفولية لو اتعاملت معاه جد زيادة هيتضايق، لازم يكون فيه توازن، وحبيت بنت زمان ولكن كان صعب اعترفلها بحبي، وبقيت بصاحب أكتر من واحدة في نفس الوقت، لأن فيه فترة كده بتبقى محلو وصحتك حلوة فـ ليه لأ، وعايز تشوف تجارب في اللي دمها خفيف وفي اللي رومانسية.
